بلوچستان کی مکران کوسٹل ہائی وے پر مسافر کوچ اور گیس باؤزر کے درمیان تصادم کے بعد آگ بھڑک اٹھی، جس کے نتیجے میں 10 افراد جاں بحق اور 27 زخمی ہوگئے۔
حادثہ اس وقت پیش آیا جب تربت سے کراچی جانے والی مسافر کوچ مکران کوسٹل ہائی وے پر گیس باؤزر سے ٹکرا گئی۔ تصادم کے بعد دونوں گاڑیوں میں آگ لگ گئی، جس نے مسافروں کو اپنی لپیٹ میں لے لیا۔
ریسکیو ذرائع کے مطابق مسافر کوچ سے 8 جبکہ گیس باؤزر سے 2 افراد کی لاشیں نکالی گئی ہیں۔ حادثے میں جاں بحق ہونے والے تمام افراد کی موت جھلسنے کے باعث ہوئی۔
ریسکیو ذرائع کے مطابق جاں بحق ہونے والوں میں 3 بچے، گیس باؤزر کا ڈرائیور اور کلینر بھی شامل ہیں۔ حادثے میں زخمی ہونے والے 27 افراد کو بھی ریسکیو کیا گیا ہے۔
وزیر اعلیٰ بلوچستان کا اظہار افسوس
وزیر اعلیٰ بلوچستان نے مکران کوسٹل ہائی وے پر پیش آنے والے حادثے میں قیمتی جانوں کے ضیاع پر افسوس کا اظہار کیا ہے۔ انہوں نے متعلقہ حکام کو زخمیوں کو بروقت اور بہترین طبی امداد فراہم کرنے کی ہدایت کی ہے۔
بلوچستان میں حالیہ مہینوں کے دوران بھی کئی بڑے ٹریفک حادثات پیش آچکے ہیں۔
23 اکتوبر کو ضلع لسبیلہ کے علاقے اوتھل میں مسافر بس اور ویگن کے تصادم میں 10 افراد جاں بحق اور متعدد زخمی ہوگئے تھے۔
اسی طرح 11 اکتوبر کو بولان میں مچھ کے قریب ٹرک اور مسافر وین کے تصادم میں 7 افراد جاں بحق جبکہ 30 سے زائد زخمی ہوئے تھے۔
3 جولائی کو شیرانی کے علاقے دانہ سر میں مسافر بس کے المناک حادثے میں 40 افراد جاں بحق ہوگئے تھے۔





