معرکہِ حق کی مناسبت سے بلوچستان کے دارالحکومت کوئٹہ سمیت صوبے کے مختلف اضلاع میں پاک فوج کے ساتھ اظہارِ یکجہتی کے لیے ڈیجیٹل مہم کا آغاز کر دیا گیا ہے۔ کوئٹہ کے اہم مقامات بشمول ڈی ایچ اے، کینٹ اور شہر کے دیگر مصروف ترین علاقوں میں لگی بڑی ڈیجیٹل اسکرینوں پر معرکہِ حق کا خصوصی مواد کامیابی کے ساتھ نشر کیا جا رہا ہے۔ اس اقدام کا مقصد قومی جذبے کو اجاگر کرنا اور عوام تک اتحاد و یگانگت کا پیغام پہنچانا ہے، جس کے لیے تمام متعلقہ اسٹیک ہولڈرز کی معاونت سے مواد کی عوامی مقامات پر دستیابی کو یقینی بنایا گیا ہے۔
معرکہِ حق کی یہ تقریبات نہ صرف کوئٹہ بلکہ گوادر سے لے کر صوبے کے دیگر حصوں تک گونج رہی ہیں، جہاں بلوچستان کے غیور شہری اپنی افواج کے ساتھ کندھے سے کندھا ملا کر کھڑے ہیں۔ ان اسکرینوں پر چلنے والا بصری مواد اس حقیقت کا عکاس ہے کہ دشمن کے پروپیگنڈے کے برعکس، عوام اور فوج کے درمیان رشتہ پہلے سے زیادہ مضبوط ہو چکا ہے۔ صوبے کے طول و عرض میں شہریوں کی جانب سے افواجِ پاکستان کے دفاعی کردار کی بھرپور حمایت کی جا رہی ہے، جو کہ قومی ہم آہنگی کا ایک واضح ثبوت ہے۔
یہ ڈیجیٹل مہم دراصل پاکستان کے تمام صوبوں کے درمیان مضبوط تعلق اور وفاق کے استحکام کی علامت ہے۔ بلوچستان کی جانب سے اس مہم میں ہراول دستے کا کردار ادا کرنا اس بات کو واضح کرتا ہے کہ ملک کی ترقی اور دفاع کے معاملے میں پورا پاکستان ایک صفحے پر ہے۔ معرکہِ حق کی یاد میں منائی جانے والی یہ تقریبات حب الوطنی کے جذبے کو جلا بخش رہی ہیں اور اس عزم کا اعادہ کر رہی ہیں کہ ملکی سالمیت اور قومی وقار کے تحفظ کے لیے پوری قوم متحد ہے اور کسی بھی چیلنج کا مقابلہ کرنے کے لیے تیار ہے۔
دیکھئیے:ستاروں سے آگے کا جہاں: اقبال کے شاہین کا معرکہ حق سے مرکزِ امت تک کا سفر