ہندی اور مراٹھی سینما کے معروف اداکار نانا پاٹیکر 75 برس کی عمر میں انتقال کر گئے۔
بھارتی میڈیا کے مطابق نانا پاٹیکر کو جمعرات کی علی الصبح گوا میں واقع اپنی رہائش گاہ پر بے ہوش پایا گیا۔ انہیں فوری طور پر منی پال ہسپتال منتقل کیا گیا، جہاں ڈاکٹروں نے تقریباً 45 منٹ تک سی پی آر کے ذریعے ان کی جان بچانے کی کوشش کی۔
ہسپتال انتظامیہ کے مطابق نانا پاٹیکر کو صبح 5 بج کر 20 منٹ پر مردہ قرار دیا گیا۔ ان کے بیٹے ملہار پاٹیکر نے بھی والد کے انتقال کی تصدیق کی ہے۔ رپورٹس کے مطابق موت کی حتمی وجہ جاننے کے لیے پوسٹ مارٹم کیا جائے گا۔
نانا پاٹیکر کا فنی سفر
نانا پاٹیکر کا اصل نام وشواناتھ پاٹیکر تھا۔ انہوں نے تھیٹر سے اپنے فنی سفر کا آغاز کیا اور بعد ازاں ہندی اور مراٹھی فلموں میں نمایاں مقام بنایا۔
ان کی منفرد آواز، طاقتور مکالموں اور جذباتی اداکاری نے انہیں بھارتی سینما میں الگ شناخت دی۔ انہوں نے اداکاری کے ساتھ ہدایت کاری اور اسکرین رائٹنگ میں بھی کام کیا۔
ان کی معروف فلموں میں پرندا، پراہار، کرانتی ویر، ترنگا، اگنی ساکشی، خاموشی: دی میوزیکل، ب تک چھپن، راج نیتی اور ویلکم شامل ہیں۔
فلم ویلکم میں گینگسٹر ادے شیٹی کا کردار بھی ان کے مقبول کرداروں میں شمار ہوتا ہے۔
نانا پاٹیکر کو سنیما میں خدمات کے اعتراف میں 2013 میں پدم شری سے نوازا گیا تھا۔ انہیں تین قومی فلم ایوارڈز سمیت متعدد اعزازات بھی ملے۔
نانا پاٹیکر کے انتقال کی خبر سامنے آنے کے بعد ان کے مداحوں میں غم کی لہر دوڑ گئی۔ سوشل میڈیا پر مداح اور شوبز سے وابستہ شخصیات ان کی وفات پر افسوس کا اظہار کر رہی ہیں اور ان کی اداکاری اور یادگار کرداروں کو یاد کر رہی ہیں۔
اداکار ریتیش دیش مکھ نے بھی نانا پاٹیکر کے انتقال پر گہرے صدمے کا اظہار کرتے ہوئے انہیں بے مثال اداکار قرار دیا۔