اسلام آباد میں شنگھائی تعاون تنظیم (ایس سی او) کے کونسل آف نیشنل کوآرڈی نیٹرز کا اہم اجلاس پاکستان کی زیر صدارت منعقد ہوا۔ نائب وزیراعظم و وزیر خارجہ اسحاق ڈار نے اجلاس سے خطاب کرتے ہوئے رکن ممالک کے درمیان جامع اور تعمیری تعاون کے عزم کو دہرایا۔
وزارت خارجہ کے ترجمان کے مطابق اسحاق ڈار نے رکن ممالک کے قومی رابطہ کاروں، ایس سی او سیکریٹریٹ اور ریجنل اینٹی ٹیررسٹ اسٹرکچر کے نمائندوں کا خیرمقدم کیا۔ انہوں نے واضح کیا کہ پاکستان تنظیم کی چیئرمین شپ کو ‘شنگھائی اسپرٹ’ کے اصولوں کے مطابق آگے بڑھائے گا۔
نائب وزیراعظم نے پاکستان کی صدارت کے مرکزی موضوع پر روشنی ڈالی۔ انہوں نے کہا کہ ہمارا مقصد وژن کو عملی اقدامات، باہمی رابطہ کاری، جدت اور مشترکہ خوشحالی میں تبدیل کرنا ہے۔ اس اشتراک سے خطے میں ٹھوس نتائج حاصل کیے جائیں گے۔
اسحاق ڈار نے اسلام آباد میں 2027 کے ایس سی او کونسل آف ہیڈز آف اسٹیٹ اجلاس کی میزبانی سے متعلق تیاریوں کا ذکر بھی کیا۔ انہوں نے پاکستان کی چیئرمین شپ کو نتیجہ خیز بنانے کے لیے تمام رکن ممالک کے درمیان قریبی اور موثر رابطوں پر زور دیا۔