وزیراعظم شہباز شریف نے خطاب کرتے ہوئے کہا کہ پاکستان کی معاشی بحالی اور قومی یکجہتی دیکھ کر بھارت حیران ہے، کیونکہ ملکی معیشت مستحکم سلامتی کے ساتھ عالمی سطح پر اپنا مقام حاصل کر چکی ہے۔
وزیر اعظم نے اسلام آباد میں منعقدہ تقریب سے خطاب کرتے ہوئے کہا کہ معرکۂ حق کے بعد پاکستان کا دنیا میں منفرد مقام بن چکا ہے۔ دنیا آپ کی بات مان رہی ہے، سرمایہ کاری کے لیے رابطہ کر رہی ہے۔
انہوں نے اپنے خطاب میں خصوصی طور پر فیلڈ مارشل سید عاصم منیر کی کاوشوں کو سراہتے ہوئے کہا کہ ان کی معاونت کے بغیر متعدد مسائل کا حل ممکن نہیں تھا۔ حکومت اور فوج کی شراکت داری ملک کے لیے بہترین ثابت ہو رہی ہے۔ اگر یہی سلسلہ جاری رہا تو پاکستان دنیا کے مضبوط ترین ممالک میں شمار ہوگا۔
وزیراعظم نے مزید کہا کہ پاکستان کی خودمختاری، معاشی استحکام اور سلامتی کے اقدامات نے بین الاقوامی سطح پر اعتماد پیدا کیا ہے۔ ان کے بقول “بھارت حیران رہ جائے گا کہ پاکستان اتنا مستحکم و مضبوط ملک کیسے بن گیا۔
حکومتی ترجمان کے مطابق وزیراعظم کا خطاب ملکی خود اعتمادی اور بین الاقوامی تعلقات میں پاکستان کے بڑھتے کردار کے عزم کا اظہار ہے۔
دیکھیے: افواجِ پاکستان ہر خطرے سے نمٹنے کے لیے ہمہ وقت تیار ہیں: فیلڈ مارشل