وزیر اعظم شہباز شریف نے تصدیق کی ہے کہ پاکستان کی مسلسل ثالثی کوششوں کے نتیجے میں فریقین کے مابین امن معاہدے کا حتمی اور متفقہ متن تیار کر لیا گیا ہے۔ انہوں نے واضح کیا کہ پاکستان اس وقت اگلے مراحل کو حتمی شکل دینے کے لیے دونوں فریقوں کے ساتھ مل کر قریبی تعاون کر رہا ہے اور اس تاریخی موقع پر امن کے قیام کے جتنے قریب ہم آج ہیں، پہلے کبھی نہیں تھے۔
سماجی رابطے کی ویب سائٹ پر جاری کردہ ایک بیان میں وزیر اعظم شہباز شریف نے کہا کہ پاکستان کی جانب سے جاری شدید ثالثی کوششوں کے دوران ہمیں ان عناصر کی مسلسل گمراہ کن مہم کا مکمل ادراک ہے جو اس امن معاہدے کو سبوتاژ کرنا چاہتے ہیں۔
انہوں نے تاکید کی کہ تمام تر منفی پراپیگنڈے اور افواہوں کو پسِ پشت ڈالتے ہوئے اس بات کی تصدیق کی جاتی ہے کہ فریقین ایک متفقہ متن پر پہنچ چکے ہیں۔
وزیر اعظم کا مزید کہنا تھا کہ تمام تر رکاوٹوں کے باوجود پاکستان خطے میں پائیدار امن کے استحکام کے لیے پرعزم ہے اور اب دونوں اطراف کے ساتھ مل کر اگلے اقدامات کو عملی جامہ پہنانے کے لیے کام کیا جا رہا ہے۔ انہوں نے امید ظاہر کی کہ یہ پیش رفت خطے میں طویل المدتی امن و امان کی ضامن بنے گی۔