سعودی عرب کے وزیر خارجہ شہزادہ فیصل بن فرحان نے قطر اور مصر کے وزرائے خارجہ سے الگ الگ ٹیلی فونک رابطے کیے ہیں، جن میں خطے کی تازہ صورتحال، بڑھتی ہوئی کشیدگی میں کمی اور امن و استحکام کے لیے سفارتی کوششوں پر تبادلہ خیال کیا گیا۔
سعودی وزارت خارجہ کے مطابق شہزادہ فیصل بن فرحان نے قطر کے وزیراعظم و وزیر خارجہ شیخ محمد بن عبدالرحمان آل ثانی سے گفتگو کی۔ اس دوران علاقائی پیش رفت اور کشیدگی کم کرنے کے لیے مشترکہ کوششوں کی اہمیت پر بات چیت ہوئی۔
سعودی وزیر خارجہ نے اپنے مصری ہم منصب بدر عبدالعاطی سے بھی ٹیلی فونک رابطہ کیا۔ گفتگو میں خطے کی مجموعی صورتحال اور امن و استحکام کے قیام کے لیے جاری سفارتی کوششوں پر تبادلہ خیال کیا گیا۔
دونوں رابطوں کے دوران علاقائی معاملات پر مشاورت جاری رکھنے اور خطے میں امن و استحکام کے فروغ کے لیے سفارتی تعاون کی اہمیت پر زور دیا گیا۔
