وزیراعظم شہباز شریف نے راب جیٹن کو نیدرلینڈز کے وزیراعظم کا عہدہ سنبھالنے پع مبارکباد پیش کی ہے۔ ایکس پر جاری کردہ پیغام میں وزیراعظم نے راب جیٹن کی نئی ذمہ داریوں میں ان کی کامیابی کے لیے نیک خواہشات کا اظہار کیا۔
وزیراعظم شہباز شریف نے اپنے پیغام میں اس عزم کا اعادہ کیا کہ وہ پاکستان اور نیدرلینڈز کے مابین طویل عرصے سے قائم دوستانہ اور مضبوط تعلقات کو مزید گہرا کرنے کے لیے نئے ڈچ وزیراعظم کے ساتھ مل کر کام کرنے کے منتظر ہیں۔ انہوں نے دونوں ممالک کے مابین دوطرفہ تعاون کو مزید وسعت دینے کی ضرورت پر بھی زور دیا۔
سفارتی ماہرین کے مطابق وزیراعظم شہباز شریف کا یہ تہنیتی پیغام پاکستان اور نیدرلینڈز کے درمیان تجارتی، معاشی اور سیاسی تعاون کو نئی بلندیوں پر لے جانے کی خواہش کا عکاس ہے۔ واضح رہے کہ نیدرلینڈز یورپی یونین میں پاکستان کا ایک اہم تجارتی شراکت دار ہے اور دونوں ممالک کے مابین مختلف شعبوں میں تعاون کی طویل تاریخ موجود ہے۔
توقع ظاہر کی جا رہی ہے کہ نئی ڈچ قیادت کے ساتھ پاکستان کے روابط میں مزید بہتری آئے گی، جس سے نہ صرف دوطرفہ تجارت کو فروغ ملے گا بلکہ عالمی فورمز پر بھی باہمی ہم آہنگی میں اضافہ ہوگا۔
دیکھیے: پاک آسٹریا سفارتی و اقتصادی تعلقات: وزیراعظم شہباز شریف کے دورہ ویانا کے ثمرات