ایک تخت ، دو دعوے دار! کابل ۔۔۔ یا قندھار ؟؟
طالبان کے اقتدار کا اصل بادشاہ کون؟
یہ کہانی ہے ایک ایسی سلطنت کی ۔۔ جس کو پانے کے لیے آگ اور خون کی ہولی کھیلی جارہی ہے۔۔ ایسی ہولی جس کے لہو میں نہ صرف آس پڑوس کے بے قصور لوگ لپیٹے جارہے ہیں بلکہ اپنے گھر کے افراد کو بھی خون سے رنگا جارہا ہے ۔۔
یہ کہانی ہے ایک حکومت کے دو الگ الگ کرداروں کی ۔۔
یہ کہانی ہے خطے میں آگ بیچنے والے دہشت کے بازاروں کی۔۔
طالبان کے نام پر افغان عوام کا امن برباد کرنے والے بنجاروں کی ۔۔
افغانستان ۔۔ یہاں بادشاہتیں بھی آئیں۔۔
جمہوری حکومتیں بھی ۔۔
کمیونسٹ اقتدار بھی۔۔
سوویت فوج بھی ۔۔
مجاہدین بھی۔۔
اور اب طالبان بھی ۔۔
افغانستان میں طالبان کی حکومت بظاہر ایک مرکزی قیادت کے تحت کام کر رہی ہے، لیکن اقتدار کے ایوانوں میں طاقت کی تقسیم سے متعلق کئی سوالات سامنے آ رہے ہیں۔ ایک طرف قندھار میں سپریم لیڈر ہیبت اللہ اخوندزادہ کا مذہبی اور فیصلہ کن اختیار ہے، جبکہ دوسری جانب کابل میں سراج الدین حقانی اور دیگر بااثر شخصیات حکومتی، عسکری اور انٹیلی جنس اداروں میں اہم عہدوں پر فائز ہیں۔ بظاہر یہ ایک ہی حکومت ہے، لیکن کیا اس کے اندر طاقت کے دو الگ مراکز بھی موجود ہیں؟
ایک مستند تحقیق کے مطابق طالبان حکومت کے اندر دو متوازی اقتداری حلقوں کی نشاندہی کی جاتی ہے۔ قندھار کا مرکز پرانی کوئٹہ شوریٰ کے طرز پر مذہبی اور مرکزی اختیار کی نمائندگی کرتا ہے، جبکہ کابل کا طاقتور حلقہ میران شاہ نیٹ ورک اور باہمی سرپرستی کے نظام سے منسلک ہے۔
قندھار میں ہیبت اللہ اخوندزادہ کے گرد گورنر ملا محمد شیرین اخوند، وزیراعظم ملا محمد حسن اخوند اور نائب وزیراعظم عبدالغنی برادر اہم شخصیات ہیں۔ دوسری جانب کابل میں وزیر داخلہ سراج الدین حقانی، انٹیلی جنس چیف عبد الحق وثیق اور وزیر دفاع ملا محمد یعقوب کو بااثر کرداروں میں شمار کیا گیا ہے۔ رپورٹ کے مطابق ملا محمد یعقوب، اپنے درانی قبائلی پس منظر کے باوجود، عملی طور پر کابل کے حلقے کے قریب ہیں اور قندھار کی مداخلت کے مخالف سمجھے جاتے ہیں۔
یہ تقسیم محض سیاسی شخصیات یا انتظامی عہدوں تک محدود نہیں بتائی جا رہی، بلکہ رپورٹ عسکری اور سکیورٹی اداروں میں بھی مختلف اثر و رسوخ کی نشاندہی کرتی ہے۔ کابل کے حلقے سے گردیز کی 203ویں منصوری کور، بدری 313 کے لیے مختص 50 ہزار اہلکاروں کی آسامیاں اور تاجمیر جواد کی قیادت میں 3500 اہلکاروں پر مشتمل فتح فورس منسلک کی گئی ہے۔
اس کے مقابلے میں قندھار کے زیرِ اثر 205ویں البدر کور، 8 ہزار اہلکاروں پر مشتمل ہبتی بارڈر فورس، عبدالاحد طالب کے کمانڈوز، ذوالفقار اور بطار خصوصی دستے، جبکہ تقریباً 40 ہزار افراد پر مشتمل نورزئی قبائلی لشکر کا ذکر کیا گیا ہے۔
یہ تفصیلات ایک اہم سوال کو جنم دیتی ہیں۔۔
کیا طالبان حکومت کے عسکری اور سکیورٹی ادارے ایک ہی مرکزی کمان کے تحت کام کر رہے ہیں ؟
یا مختلف طاقتور حلقوں کا ان پر الگ الگ اثر و رسوخ موجود ہے؟
تاہم رپورٹ میں دی گئی نفری اور آسامیاں لازماً عملی طور پر تعینات اہلکاروں کی تعداد کا ثبوت نہیں ہیں۔
اقتدار کی اس مبینہ تقسیم کا ایک اور اہم پہلو مالی وسائل پر کنٹرول ہے۔ الخبیر انویسٹی گیشن کے مطابق، مئی 2023 میں وزیر خزانہ ہدایت اللہ بدری کو وزارت خزانہ سے مرکزی بینک منتقل کیے جانے کے بعد قندھار نے عشر اور زکوٰۃ سے حاصل ہونے والی آمدنی اپنے الگ مالیاتی دفتر کی طرف منتقل کرنا شروع کر دی۔
تحقیقاتی رپورٹ مزید دعویٰ کرتی ہے کہ حقانی نیٹ ورک اپنے سرپرستی کے نظام کے اخراجات پورے کرنے کے لیے خوست اور پکتیا میں کرومائٹ اور لکڑی کی تجارت سے حاصل ہونے والی آمدنی پر انحصار کرتا ہے، جسے رپورٹ نے بلیک بجٹ کا نام دیا ہے۔ اس حوالے سے اقوام متحدہ کی سلامتی کونسل کی دستاویز S/2023/370 کا حوالہ بھی پیش کیا گیا ہے۔
قندھار اور کابل کے ان مبینہ اختلافات کو سمجھنے کے لیے کوئٹہ شوریٰ اور میران شاہ نیٹ ورک کی تاریخی حیثیت بھی اہم ہے۔ کوئٹہ شوریٰ طالبان کی روایتی مرکزی قیادت سے وابستہ رہی ہے، جبکہ میران شاہ نیٹ ورک کا تعلق حقانی نیٹ ورک کے تاریخی اثر و رسوخ اور شمالی وزیرستان و لویہ پکتیا سے جڑے روابط سے ہے۔ رپورٹ موجودہ اقتداری تقسیم کو انہی دو تاریخی دھاروں کے تناظر میں دیکھتی ہے۔
اقوام متحدہ کی سلامتی کونسل کی رپورٹ ایس/2024/499 میں بھی طالبان قیادت کے اندر اختلافات اور داخلی کشیدگی کا ذکر موجود ہے۔ تاہم اسی رپورٹ میں ہبت اللہ اخوندزادہ کے مرکزی اختیار مستحکم ہونے کی نشاندہی بھی کی گئی ہے۔ اس لیے طالبان کے اندر اختلافات کی موجودگی کو دو مکمل طور پر الگ حکومتوں اور عسکری نظاموں کے قیام کا حتمی ثبوت نہیں سمجھا جا سکتا۔ الخبیر انویسٹی گیشن کے پیش کردہ عسکری اعداد و شمار اور مالیاتی دعووں کی آزادانہ تصدیق بھی ضروری ہے۔
افغانستان میں طالبان حکومت کے مستقبل کے حوالے سے اصل سوال یہی ہے کہ قندھار اور کابل کے درمیان طاقت کا توازن کس حد تک برقرار رہتا ہے۔ اگر اختلافات انتظامی اور پالیسی معاملات تک محدود ہیں تو انہیں حکومتی نظام کے اندر حل کیا جا سکتا ہے، لیکن اگر ان کا دائرہ عسکری کمان، انٹیلی جنس اور مالی وسائل تک پھیلتا ہے تو اس کے اثرات حکومتی فیصلہ سازی پر بھی مرتب ہو سکتے ہیں۔
بظاہر افغانستان میں حکومت ایک ہے، قیادت ایک ہے اور اقتدار بھی طالبان کے پاس ہے؛ تاہم اصل صورت حال کو سمجھنے کے لیے یہ دیکھنا اہم ہوگا کہ سیاسی فیصلے کون کرتا ہے، عسکری اداروں پر کس کا اثر و رسوخ ہے اور مالی وسائل کا اختیار کس کے پاس ہے۔ قندھار اور کابل کے درمیان یہی توازن آنے والے وقت میں طالبان حکومت کے اندرونی ڈھانچے کی سمت متعین کرنے میں اہم کردار ادا کر سکتا ہے۔





