امریکی صدر ڈونلڈ ٹرمپ ایشیائی بحرالکاہل اقتصادی تعاون (اپیک) سربراہ اجلاس میں شرکت کے لیے چین پہنچ گئے، جہاں چینی صدر شی جن پنگ اور روسی صدر ولادیمیر پیوٹن کے ساتھ ان کی مجوزہ سہ فریقی ملاقات عالمی سفارت کاری میں اہم پیش رفت قرار دی جا رہی ہے۔
امریکی صدر ڈونلڈ ٹرمپ فلپائن میں آسیان، امریکا اور کواڈ رہنماؤں کے اجلاسوں میں شرکت کے بعد چین کے شہر شینزن پہنچے، جہاں چینی صدر شی جن پنگ نے خود ایئرپورٹ پر ان کا استقبال کیا۔
روسی صدر ولادیمیر پیوٹن بھی ٹرمپ کی آمد سے چند گھنٹے قبل شینزن پہنچ چکے تھے۔ تاہم ان کا استقبال چینی صدر کے چیف آف اسٹاف نے کیا۔ دونوں امریکی اور روسی صدور کے استقبال کے لیے چینی قیادت کے مختلف نمائندوں کی آمد کو بھی سفارتی سطح پر اہمیت دی جا رہی ہے۔
ٹرمپ اور شی جن پنگ کی ملاقات
ٹرمپ کا دورۂ چین ایسے وقت میں ہو رہا ہے جب واشنگٹن اور بیجنگ کے درمیان تجارتی پالیسیوں، محصولات اور آزاد تجارت کے معاملات پر اختلافات موجود ہیں۔
امریکی صدر نے اپنی موجودہ مدتِ صدارت کے آغاز میں چین کے خلاف سخت تجارتی پالیسی اختیار کرتے ہوئے مختلف محصولات عائد کرنے کا مؤقف اپنایا تھا۔ تاہم اب دونوں ممالک کی قیادت کے درمیان اعلیٰ سطح کے رابطوں اور اقتصادی تعاون کے امکانات پر توجہ مرکوز ہے۔
چینی صدر شی جن پنگ نے اپیک سربراہ اجلاس کا افتتاح کرتے ہوئے آزاد تجارت، عالمی اقتصادی تعاون اور مصنوعی ذہانت کے شعبے میں مشترکہ پیش رفت پر زور دیا۔ ان کا کہنا تھا کہ عالمی معیشت کو درپیش چیلنجز سے نمٹنے کے لیے ممالک کے درمیان تعاون ضروری ہے۔
ٹرمپ، پیوٹن اور شی جن پنگ کی ممکنہ ملاقات اہم کیوں؟
اپیک سربراہ اجلاس کے موقع پر ٹرمپ، شی جن پنگ اور پیوٹن کی مجوزہ ملاقات کو عالمی سفارت کاری کے تناظر میں غیر معمولی اہمیت حاصل ہے۔
تینوں رہنما امریکا، چین اور روس جیسی بڑی عالمی طاقتوں کی نمائندگی کرتے ہیں۔ ان کی ایک ساتھ ممکنہ ملاقات میں عالمی معیشت، تجارتی تعلقات اور علاقائی و بین الاقوامی امور زیر بحث آنے کی توقع ہے۔
تاہم اس سہ فریقی ملاقات کے ایجنڈے اور حتمی انعقاد سے متعلق تفصیلات سامنے آنا باقی ہیں۔





