بنوں: میر علی میں قبائلی امن کمیٹی کی جانب سے دی گئی مہلت ختم ہونے کے بعد پولیس اور امن کمیٹی کے اہلکاروں کے ساتھ فائرنگ کے تبادلے میں کالعدم تحریک طالبان پاکستان (ٹی ٹی پی) کا شدت پسند کمانڈر محمد فاتح عرف کاکا وزیر اپنے بیٹے اور بھتیجے سمیت ہلاک ہو گیا ہے۔
مقامی ذرائع کے مطابق امن کمیٹی نے محمد فاتح کو میر علی کا علاقہ چھوڑنے کے لیے گزشتہ جمعہ کو تین روز کی مہلت دی تھی۔ تاہم، مذکورہ دہشت گرد نے قبائلی فیصلے کی پاسداری کرنے کے بجائے پولیس اسٹیشن پر حملے کی نیت سے پیش قدمی کی، جہاں پہلے سے مستعد پولیس اور امن کمیٹی کے اہلکاروں کے ساتھ شدید جھڑپ ہوئی۔
فائرنگ کے اس تبادلے میں کمانڈر محمد فاتح موقع پر ہی مارا گیا جبکہ اس کا بیٹا اور بھتیجا بھی ہلاک ہو گئے۔ سکیورٹی ذرائع کا کہنا ہے کہ مذکورہ کمانڈر علاقے میں دہشت گردی کی متعدد کاروائیوں میں مطلوب تھا۔ واقعے کے بعد علاقے میں سکیورٹی ہائی الرٹ کر دی گئی ہے اور صورتحال مکمل طور پر قابو میں ہے، جبکہ مزید قانونی کارروائی اور تحقیقات کا آغاز کر دیا گیا ہے۔
دیکھیے: سی ٹی ڈی آپریشنز؛ اٹک میں فتنہ الخوارج کے 5 دہشت گرد ہلاک، کراچی میں 5 گرفتار