ملزم توقیر نذیر مبینہ پولیس مقابلے میں مارا گیا، 15 سالہ بچے کو گاڑی تلے کچلنے کے بعد سی سی ڈی ملتان کی حراست سے فرار ہوگیا تھا
بہاولپور میں 15 سالہ یتیم بچے وسیم عباس کو گاڑی تلے کچل کر ہلاک کرنے کا ملزم توقیر نذیر مبینہ پولیس مقابلے میں مارا گیا۔ پولیس کے مطابق ملزم کا ساتھی فائرنگ کرتے ہوئے فرار ہوگیا۔
سی سی ڈی بہاولپور کی ٹیم نے بدھ کی صبح ایسٹرن بائی پاس پر موٹرسائیکل سوار دو مشکوک افراد کو روکنے کی کوشش کی۔ اس دوران ملزمان نے رکنے کے بجائے پولیس ٹیم پر فائرنگ کردی۔
فائرنگ کے تبادلے میں ایک موٹرسائیکل سوار ہلاک ہوگیا۔ بعد ازاں اس کی شناخت توقیر نذیر کے نام سے ہوئی۔
رپورٹ کے مطابق توقیر نذیر نے گزشتہ روز ملتان میں 15 سالہ یتیم بچے وسیم عباس کو گاڑی تلے کچل دیا تھا، جس کے نتیجے میں بچہ جاں بحق ہوگیا تھا۔
واقعے کے بعد ملزم سی سی ڈی ملتان کی حراست سے فرار ہوگیا تھا۔ اس کی تلاش جاری تھی۔
سی سی ڈی حکام کے مطابق فرار ہونے والے دوسرے ملزم کی گرفتاری کے لیے خصوصی ٹیمیں تعینات کردی گئی ہیں۔
