وزارت آئی ٹی کے ادارے یونیورسل سروس فنڈ (یو ایس ایف) نے ملک کے 11 اضلاع میں ہائی اسپیڈ انٹرنیٹ، وائس کمیونیکیشن اور فائبر آپٹیکل کیبل نیٹ ورک کی سہولیات فراہم کرنے کے لیے 13 ارب روپے مالیت کے 9 بڑے میگا پراجیکٹس کی منظوری دے دی ہے۔
تفصیلات کے مطابق اجلاس کی صدارت وفاقی سیکرٹری آئی ٹی ضرار ہاشم خان نے کی جبکہ اجلاس میں چیئرمین پی ٹی اے میجر جنرل (ر) حفیظ الرحمان، ممبر ٹیلی کام جہانزیب رحیم، چیف ایگزیکٹو آفیسر یو ایس ایف چوہدری مدثر نوید، محمد یوسف اور عائلہ ماجد نے شرکت کی۔
ذرائع کے مطابق ان پراجیکٹس کی تکمیل سے تقریباً 55 لاکھ سے زائد افراد کو انٹرنیٹ اور موبائل کنیکٹیویٹی کی جدید سہولیات میسر آئیں گی۔ اس کے علاوہ 11 اضلاع کے 178 ٹاؤنز اور یونین کونسلوں کے ساتھ ساتھ 753 دیہات کے رہائشی بھی ڈیجیٹل دنیا سے منسلک ہو سکیں گے جس سے ملک میں ڈیجیٹل رابطے اور آن لائن سہولیات کے نئے دروازے کھلیں گے۔
یو ایس ایف کا کہنا ہے کہ مذکورہ اقدامات کی بدولت پاکستان میں ڈیجیٹل انفراسٹرکچر کو مضبوط بنانے اور عام شہریوں تک جدید اور تیز ترین اشیاء پہنچانے کے لیے انتہائی اہم ہیں۔ نیز یہ منصوبہ شہری و دیہاتی علاقوں تفریق ختم کرنے میں اہم کردار ادا کریں گے۔ ماہرین کے مطابق اس اقدام سے نہ صرف تعلیمی اور صحت کے شعبوں میں بہتری آئے گی بلکہ کاروباری مواقع بھی بڑھیں گے اور دور دراز علاقوں میں رہنے والے افراد بھی ڈیجیٹل معیشت کا حصہ بن سکیں گے۔
دیکھیں: مستحکم معیشت اور جدید کاروباری حکمت عملی اپنانا ضروری ہے، گورنر اسٹیٹ بینک