امریکہ کے وزیرِ مشیر برائے عوامی سفارت کاری اینڈی ہیلس نے دعویٰ کیا ہے کہ پاکستان اور امریکہ کے تعلقات اس وقت اپنی تاریخ کی بلند ترین سطح پر ہیں۔ انہوں نے کہا کہ دونوں ممالک کی قیادت کے مابین مضبوط اور دوستانہ روابط قائم ہیں۔
ایک نیوز چینل کو دیے گئے انٹرویو میں امریکی سفارتکار نے کہا کہ فیلڈ مارشل سید عاصم منیر، امریکی صدر ڈونلڈ ٹرمپ اور وزیرِاعظم شہباز شریف کے مابین قریبی تعلقات و روابط ہیں۔ ان کے مطابق صدر ڈونلڈ ٹرمپ نے متعدد مواقع پر فیلڈ مارشل سید عاصم منیر اور وزیراعظم شہباز شریف کے کردار اور قیادت کی تعریف کی ہے۔
اینڈی ہیلس نے پاکستان کی مہمان نوازی کو اس کا حقیقی قومی وصف قرار دیتے ہوئے کہا کہ پاکستانی عوام احترام، محبت اور خلوص کے ساتھ مہمانوں کا استقبال کرتے ہیں۔ انہوں نے کہا کہ پاکستان میں آنے والے غیر ملکی مہمانوں کو غیر معمولی گرمجوشی، عزت اور اپنائیت ملتی ہے۔
ثقافتی حوالے سے گفتگو کرتے ہوئے امریکی سفارتکار نے کہا کہ پاکستان کی موسیقی اعلی معیار کی حامل ہے۔ انہوں نے بریانی کو پاکستان کی سب سے مقبول ڈش قرار دیتے ہوئے کراچی کی بریانی کی تعریف کی۔ اینڈی ہیلس نے کہا کہ کوک اسٹوڈیو نہ صرف ایک کامیاب تجارتی منصوبہ ہے بلکہ یہ پاکستانی ثقافت، موسیقی اور کمیونٹی کو عالمی سطح پر اجاگر کرنے میں بھی اہم کردار ادا کر رہا ہے۔
اسی طرح تعلیم کو پاکستان اور امریکہ کے تعلقات کا بنیادی ستون قرار دیتے ہوئے اینڈی ہیلس نے کہا کہ پاکستان میں فل برائٹ پروگرام کے 75 سال مکمل ہو چکے ہیں، جس کے تحت 9 ہزار سے زائد پاکستانی طلبہ امریکا کی ممتاز جامعات میں تعلیم حاصل کر چکے ہیں۔ ان کے مطابق دنیا کا سب سے بڑا فل برائٹ پروگرام اس وقت پاکستان میں جاری ہے۔
انہوں نے مزید بتایا کہ اسلام آباد میں یو ایس ای ایف پی کی نئی عمارت قائم کی گئی ہے، جہاں پاکستانی نوجوانوں کے لیے مفت تعلیمی اور پیشہ ورانہ پروگرام فراہم کیے جا رہے ہیں۔ اس کے علاوہ انٹرنیشنل وزیٹر لیڈرشپ پروگرام اور دیگر قلیل مدتی تبادلہ پروگرام پاکستانی پیشہ ور افراد کو امریکا میں تربیت اور پالیسی سے متعلق تجربہ فراہم کر رہے ہیں۔
اقتصادی تعاون پر بات کرتے ہوئے امریکی سفارتکار نے کہا کہ امریکی ایکسپورٹ امپورٹ بینک کی معاونت سے پاکستان کے ریکوڈک معدنی منصوبے میں کئی ارب ڈالر کی سرمایہ کاری متوقع ہے۔ ان کے مطابق امریکی کمپنیاں پاکستان کے مائننگ اور معدنیات کے شعبے میں بڑھتی ہوئی دلچسپی ظاہر کر رہی ہیں۔
اینڈی ہیلس نے پاکستانی نوجوانوں پر زور دیا کہ وہ یو ایس ای ایف پی اور ایجوکیشن یو ایس اے کے مفت تعلیمی وسائل سے بھرپور فائدہ اٹھائیں۔ انہوں نے اس اعتماد کا اظہار کیا کہ مستقبل میں امریکی کمپنیاں پاکستان میں مزید اربوں ڈالر کی سرمایہ کاری کریں گی۔
دیکھیں: افغانستان سے امریکی فوج کے انخلا پر ٹرمپ کی ایک بار پھر تنقید، فیصلے کو ”غیر دانشمندانہ” قرار دے دیا