پاکستان نے جنوبی سوڈان کے عوام کی خدمت میں ایک بار پھر اپنے کلیدی کردار کا اعادہ کیا ہے، جہاں پاکستانی امن دستے اقوامِ متحدہ کے مشن کے تحت امن، بحالی اور انسانی امداد کے لیے مثالی خدمات انجام دے رہے ہیں۔
حکومتی ذرائع کے مطابق پاکستانی امن دستوں میں شامل ڈاکٹرز اور انجینئرز نہایت پیشہ ورانہ مہارت، فرض شناسی اور لگن کے ساتھ فرائض سرانجام دے رہے ہیں، جس پر پاکستان کو فخر ہے۔ پاکستانی امن اہلکار نہ صرف امن و امان کے قیام میں معاون ہیں بلکہ مقامی آبادی کو درپیش انسانی اور ماحولیاتی چیلنجز سے نمٹنے میں بھی عملی کردار ادا کر رہے ہیں۔
جنوبی سوڈان کے علاقے بنتیو میں موسمیاتی تبدیلیوں کے باعث سیلابی صورتحال میں نمایاں اضافہ ہوا ہے۔ رپورٹ کے مطابق خشک موسم کے دوران بھی پانی کی سطح غیر معمولی طور پر بلند رہتی ہے، جس سے انسانی جانوں کو خطرات لاحق ہیں اور زرعی پیداوار بری طرح متاثر ہو رہی ہے۔
اسی تناظر میں اقوامِ متحدہ کے مشن کے تحت تعینات پاکستانی انجینئرز سال بھر حفاظتی پشتوں کی تعمیر، مضبوطی اور دیکھ بھال کا کام انجام دے رہے ہیں تاکہ سیلاب کے خطرات کو کم کیا جا سکے اور مقامی آبادی کے لیے خوراک اور روزگار کے ذرائع محفوظ بنائے جا سکیں۔
اقوامِ متحدہ اور میزبان حکام نے پاکستانی امن دستوں کی خدمات کو سراہتے ہوئے کہا ہے کہ پاکستان جنوبی سوڈان میں امن، استحکام اور انسانی فلاح کے لیے ایک قابلِ اعتماد شراکت دار کے طور پر نمایاں کردار ادا کر رہا ہے۔
دیکھیں: معرکۂ حق میں کامیابی کے بعد پاکستان کے دفاعی ساز و سامان کی مانگ میں اضافہ: وزیراعظم