چین کی سفارتی کوششوں کے دوران پاکستان کا کابل کے ساتھ مذاکرات کو فی الحال ‘سفارتی وقفہ’ دینے کا فیصلہ دراصل اس تلخ حقیقت کا برملا اعتراف ہے کہ اب محض روایتی سفارت کاری سے زمینی حقائق کو تبدیل نہیں کیا جا سکتا۔ چین کی جانب سے ثالثی کی مخلصانہ کاوشیں جو خطے کے استحکام کے لیے انتہائی اہمیت کی حامل ہیں، بلاشبہ لائقِ ستائش اور قابلِ قدر ہیں۔ چین جو پاکستان کا ایک قریبی شراکت دار ہے، خطے میں ایک پرامن اور مستحکم افغانستان کا خواہاں ہے تاکہ ‘بیلٹ اینڈ روڈ انیشیٹو’ جیسے بڑے اقتصادی منصوبوں کو تحفظ مل سکے اور علاقائی تجارت کا فروغ ممکن ہو۔
تاہم اسلام آباد کا یہ دو ٹوک مؤقف کہ ٹی ٹی پی اور دیگر کالعدم گروہوں کے خلاف ٹھوس اور ناقابلِ تردید اقدامات کے بغیر مذاکرات کا کوئی جواز نہیں، محض ایک پالیسی فیصلہ نہیں بلکہ قومی سلامتی کے تحفظ کے لیے ایک ناگزیر اور دیانت دارانہ اقدام ہے۔ پاکستان کا یہ مؤقف کہ اسے کابل سے “قابلِ تصدیق ضمانتیں” درکار ہیں، ان برسوں کی ناکامیوں اور دہشت گردی کے پے در پے واقعات کا نچوڑ ہے جن میں افغان سرزمین کا پاکستان کے خلاف تسلسل سے استعمال ہونا ایک ناقابلِ تردید حقیقت بن کر ابھرا ہے۔
چین کی موجودہ سفارتی کوششوں کا ایک اہم پہلو یہ ہے کہ وہ دونوں پڑوسیوں کے مابین اعتماد کی بحالی چاہتا ہے تاکہ خطے میں دہشت گردی کے پھیلاؤ کو روکا جا سکے۔ بیجنگ کا ماننا ہے کہ افغانستان کو سیاسی اور اقتصادی طور پر تنہا کرنے کے بجائے اسے علاقائی دھارے میں شامل کرنا زیادہ مؤثر ہوگا۔ اس کے برعکس پاکستان کی مجبوری یہ ہے کہ اس نے برسوں تک سفارتی شائستگی اور ایک برادر ملک ہونے کا حق ادا کرتے ہوئے کابل انتظامیہ کو دوستانہ اور مختلف مقامات پر اپنے تحفظات سے آگاہ کیا لیکن جواب میں صرف “اندرونی مسئلہ” کہہ کر لاتعلقی کا اظہار کیا گیا۔ جب ریاست کو یہ احساس ہو جائے کہ اس کے تحمل کو کمزوری سمجھا جا رہا ہے، تو پھر سفارت کاری کے بجائے ‘اصولی مؤقف’ کا اختیار کرنا بقا کا تقاضا بن جاتا ہے۔
چین کی ثالثی کی اہمیت اس لیے بھی زیادہ ہے کہ وہ طالبان انتظامیہ پر ایک مخصوص اثر و رسوخ رکھتا ہے، اور پاکستان کو امید ہے کہ بیجنگ اپنی سفارتی ساکھ کو استعمال کرتے ہوئے کابل کو اس بات پر قائل کرے گا کہ پاکستان کی سلامتی کے تحفظ کے بغیر علاقائی امن کا خواب شرمندہ تعبیر نہیں ہو سکتا۔ پاکستان کا یہ واضح پیغام اب عالمی سطح پر ثبت ہو چکا ہے کہ خارجہ پالیسی کے تمام تر زاویے اب ‘پاکستان سب سے پہلے’ کے اصول پر استوار ہیں۔
پاکستان کے اس مؤقف کے پیچھے کارفرما وجوہات انتہائی مضبوط ہیں۔ پہلی وجہ افغان سرزمین کا دہشت گردی کے لیے استعمال ہے۔ طالبان حکومت کا یہ اصرار کہ ٹی ٹی پی کا معاملہ پاکستان کا “اندرونی مسئلہ” ہے، نہ صرف سفارتی شائستگی کے منافی ہے بلکہ اقوامِ متحدہ کی سلامتی کونسل کی حالیہ رپورٹس کی بھی صریح نفی ہے۔ دوسری وجہ وعدہ خلافیوں کا طویل سلسلہ ہے۔ پاکستان نے نہ صرف افغان عوام کی انسانی بنیادوں پر مدد کی بلکہ عالمی سطح پر طالبان حکومت کے لیے سفارتی وکالت بھی کی، مگر جواب میں دہشت گرد گروہوں کی سرپرستی یا انہیں “پناہ” دینا پاکستان کے لیے ایک سکیورٹی بحران بن چکا ہے۔ ایسی صورتحال میں کسی بھی قسم کا مذاکرات کا ڈرامہ محض دہشت گردوں کو مزید وقت فراہم کرنے کے مترادف ہے۔
تیسری اور سب سے اہم وجہ “ریاست کی بالادستی” کا سوال ہے۔ کسی بھی خودمختار ملک کے لیے یہ ممکن نہیں کہ وہ اپنے ہی شہریوں کے خون سے ہولی کھیلنے والوں کو محض اس لیے معاف کر دے کہ وہ سرحد پار بیٹھ کر ڈوریاں ہلا رہے ہیں۔ پاکستان کا موجودہ مؤقف اس بات کا غماز ہے کہ اب خارجہ پالیسی کے ہر زاویے کی بنیاد ‘پاکستان سب سے پہلے’ کے اصول پر استوار ہے۔ اسلام آباد نے ثابت کیا ہے کہ وہ امن کا خواہاں تو ہے، مگر اس امن کے لیے وہ اپنی خودمختاری کو داؤ پر لگانے کے لیے تیار نہیں۔
اب تمام تر معاملات کابل کے ہاتھ میں ہے۔ اگر طالبان انتظامیہ اپنے ہمسایہ ملک کے ساتھ مستقل امن، برادرانہ تعلقات اور خوشگوار ہمسائیگی کی خواہاں ہے تو اسے ٹی ٹی پی کے خلاف بلا امتیاز، ٹھوس اور فیصلہ کن کارروائی کرنی ہوگی۔ چین کی سفارتی کوششیں اس وقت تک بار آور ثابت نہیں ہو سکتیں جب تک کابل اپنی پالیسیوں میں وہ بنیادی اور عملی تبدیلی نہ لائے جس کا تقاضا عالمی قوانین اور اچھے پڑوسی ہونے کے ناتے کیا جاتا ہے۔ پاکستان نے اپنی ذمہ داریاں بطریقِ احسن نبھائی ہیں، اب کابل کا امتحان ہے کہ وہ ایک ذمہ دار ریاست کے طور پر اپنے وعدوں کی پاسداری کرتا ہے یا اپنی تباہ کن پالیسیوں کو ہی جاری رکھتا ہے۔
دیکھیے: امریکی کمیشن کی بھارت پر سخت تنقید؛ آر ایس ایس اور بھارتی خفیہ ایجنسی را پر پابندیوں کی سفارش کر دی