افغان طالبان کی دہشت گردانہ سوچ اور خواتین سمیت دیگر طبقات کے خلاف اختیار کی جانے والی امتیازی پالیسیوں کے باعث کابل حکومت کی عالمی تنہائی برقرار ہے۔ اس تناظر میں قابض افغان طالبان حکومت کے خلاف بین الاقوامی سطح پر احتجاج اور سفارتی دباؤ میں مسلسل اضافہ دیکھنے میں آ رہا ہے، جبکہ عالمی انسانی حقوق کی تنظیمیں بھی اس معاملے پر متحرک ہو چکی ہیں۔
ذرائع کے مطابق آئندہ ماہ جون میں طالبان وفد کے ممکنہ دورۂ برسلز پر بین الاقوامی فیڈریشن برائے انسانی حقوق سمیت 82 عالمی تنظیموں نے گہری تشویش کا اظہار کیا ہے۔ ان تنظیموں نے یورپی یونین سے باضابطہ مطالبہ کیا ہے کہ وہ افغان طالبان کے ساتھ کسی بھی قسم کے سیاسی اور سفارتی تعلقات قائم کرنے سے مکمل گریز کرے۔
عالمی تنظیموں کا مؤقف ہے کہ طالبان افغانستان کے عوام کے حقیقی نمائندے نہیں ہیں اور نہ ہی وہ کسی شمولیتی، جمہوری یا نمائندہ سیاسی عمل کے ذریعے اقتدار میں آئے ہیں، بلکہ انہوں نے بزور طاقت ملک پر قبضہ قائم کیا ہے۔
انسانی حقوق کے نیٹ ورک نے اس بات پر بھی روشنی ڈالی ہے کہ بین الاقوامی عدالتِ انصاف (آئی سی جے) نے صنفی بنیادوں پر مظالم اور انسانی حقوق کی سنگین پامالیوں کے الزامات کے تحت طالبان کی دو اعلیٰ ترین شخصیات کے وارنٹ جاری کر رکھے ہیں، جبکہ طالبان انتظامیہ کے متعدد اہم ارکان پہلے ہی یورپی یونین کی پابندیوں کی فہرست میں شامل ہیں۔
تنظیموں نے یورپی یونین کو خبردار کیا ہے کہ یورپی سرزمین پر طالبان کے ساتھ کسی بھی سطح کے سرکاری رابطے سنگین قانونی اور سیاسی نتائج کا باعث بن سکتے ہیں اور اس سے طالبان کی غیر قانونی حکومت کو سفارتی طور پر تسلیم کیے جانے کا غلط تاثر پیدا ہو سکتا ہے۔
بین الاقوامی امور کے ماہرین کے مطابق ایک غیر منتخب اور غیر آئینی طالبان حکومت کو بین الاقوامی پلیٹ فارم فراہم کرنا افغانستان کے لاکھوں مظلوم عوام کی آواز کو دبانے کے مترادف ہوگا۔ ماہرین کا مزید کہنا ہے کہ افغان عوام، خصوصاً خواتین، اس وقت تک طالبان حکومت کو جائز تسلیم نہیں کر سکتیں جب تک انہیں ان کے بنیادی انسانی حقوق اور آزادی فراہم نہیں کی جاتی اور جب تک کابل انتظامیہ اپنی بین الاقوامی ذمہ داریوں کو پورا کرنے کا کوئی ٹھوس ثبوت پیش نہیں کرتی۔