نئی دہلی: بھارتی ریاست منی پور میں مودی حکومت کی نااہلی اور قابض بھارتی فوج کی سنگینوں کے سائے میں امن و امان کی صورتحال ہر گزرتے دن کے ساتھ ابتر ہوتی جا رہی ہے۔ ریاست میں جاری بھارتی سیکیورٹی فورسز کے مظالم اور جبر و استبداد کو خود بھارتی میڈیا جریدے ‘انڈیا ٹوڈے’ نے بے نقاب کر دیا ہے۔
رپورٹس کے مطابق منی پور کے ضلع اوکھرول میں بھارتی فوج کی جانب سے ایک نئی چوکی قائم کرنے کی کوشش کی گئی، جس کے خلاف مقامی آبادی نے شدید احتجاج کیا۔ احتجاج کو کچلنے کے لیے نیم فوجی دستے آسام رائفلز نے مظاہرین پر وحشیانہ لاٹھی چارج کیا اور ہوائی فائرنگ کی، جس کی زد میں آ کر خواتین سمیت 4 مظاہرین شدید زخمی ہو گئے۔
انڈیا ٹوڈے کی رپورٹ کے مطابق آسام رائفلز کی اس پرتشدد اور یکطرفہ کارروائی کے بعد ضلع اوکھرول میں حالات انتہائی کشیدہ ہو گئے ہیں۔ مقامی انتظامیہ اور شہریوں کا کہنا ہے کہ آسام رائفلز نے ضلعی انتظامیہ کو اعتماد میں لیے بغیر زبردستی نئی چوکی قائم کرنے کی کوشش کی، جس پر عوامی ردعمل سامنے آیا۔
مظاہرے میں شریک مقامی افراد نے مودی سرکار اور بھارتی فوج کے خلاف شدید نعرے بازی کی اور مطالبہ کیا کہ آسام رائفلز کی اس متنازع چوکی کو علاقے سے فوری طور پر ہٹایا جائے۔ مبصرین کا کہنا ہے کہ منی پور میں نسلی فسادات اور ریاستی سرپرستی میں ہونے والے مظالم کے باعث نئی دہلی سرکار کے خلاف عوامی غم و غصہ برقرار ہے۔
