امریکہ نے بغیر لائسنس ڈرائیونگ اور منشیات اسمگلنگ میں ملوث ہونے پر بھارتی ٹرک ڈرائیورز پر پابندی عائد کرنے پر غور شروع کر دیا ہے۔
بھارتی اخبار انڈیا ٹوڈے کے مطابق امریکی صدر ڈونلڈ ٹرمپ نے تارکینِ وطن ٹرک ڈرائیورز کی جگہ امریکی فوج کے سابق اہلکاروں کو تعینات کرنے کی تجویز پیش کی ہے۔
رپورٹ کے مطابق اس تجویز کے نفاذ سے امریکہ میں کام کرنے والے تقریباً ڈیڑھ لاکھ بھارتی ٹرک ڈرائیورز متاثر ہوں گے۔
انڈیا ٹوڈے کے مطابق صدر ٹرمپ نے تارکینِ وطن ڈرائیورز سے متعلق نئی تجویز پیش کرتے ہوئے کہا کہ شہریوں کی ہلاکتوں کا باعث بننے والے غیر قانونی تارکینِ وطن ڈرائیورز کے خلاف تاریخی کارروائی کی جائے گی۔
امریکی صدر نے دعویٰ کیا کہ یہ ڈرائیورز سائن بورڈز تک نہیں پڑھ سکتے اور ان میں سے بہت سے منشیات کے عادی ہیں۔
انہوں نے مزید کہا کہ یہ ڈرائیورز غیر قانونی طریقے سے ملک میں داخل ہوتے ہیں اور پورے امریکا کی سڑکوں پر گاڑیاں چلا رہے ہیں۔
بھارتی جریدے انڈیا ٹوڈے کے مطابق بھارتی ٹرک ڈرائیورز امریکہ میں سنگین حادثات اور منشیات اسمگلنگ میں ملوث ہونے کے باعث سخت جانچ کی زد میں ہیں۔
رپورٹ میں بتایا گیا ہے کہ بھارتی شہریوں کو بڑھتی مجرمانہ سرگرمیوں کے باعث مختلف ممالک میں پابندیوں سمیت ملک بدریوں کا بھی سامنا ہے۔
دیکھیے: بھارت میں پابندی کے باوجود کاکروچ تحریک کا پارلیمنٹ کی جانب مارچ شروع
