بلوچستان ساؤتھ کے اہلکاروں نے دالبندین اور ماشکیل کے علاقوں میں کارروائی کرتے ہوئے انسانی اسمگلنگ کی بڑی کوشش ناکام بنا دی اور 71 غیر قانونی افغان شہریوں کو حراست میں لے لیا ہے۔
حکام کے مطابق یہ افغان باشندے مختلف چیک پوسٹوں کی تلاشی کے دوران پکڑے گئے۔ تحقیقات سے معلوم ہوا ہے کہ گرفتار افراد پاکستان کے غیر قانونی راستوں کو استعمال کرتے ہوئے ایران، ترکیہ اور یورپ میں داخل ہونے کی کوشش کر رہے تھے۔
سکیورٹی حکام کا کہنا ہے کہ معاشی و سماجی مشکلات سے مجبور افغان شہری اکثر انسانی اسمگلنگ کے عالمی نیٹ ورکس کے جھانسے میں آ جاتے ہیں، جو انہیں بیرونِ ملک منتقل کرنے کے دلفریب خواب دکھا کر غیر قانونی طریقوں سے سفر پر مجبور کرتے ہیں۔
ایف سی نے تمام گرفتار افراد کو مزید قانونی کارروائی اور تفتیش کے لیے مقامی پولیس کے حوالے کر دیا ہے۔ حکام نے واضح کیا ہے کہ بلوچستان میں غیر قانونی امیگریشن اور انسانی اسمگلنگ کے نیٹ ورکس کے خاتمے کے لیے بلاامتیاز کارروائیاں جاری رہیں گی۔
دیکھیے: افغانستان: بدخشان میں طالبان مخالف مزاحمتی گروہوں کی سرگرمیوں میں اضافہ
