وزیراعظم شہباز شریف سے چین کے سفیر جیانگ ژائی ڈونگ نے اسلام آباد میں ملاقات کی، جس میں دوطرفہ تعلقات اور خطے کی مجموعی صورتحال پر تبادلہ خیال کیا گیا۔
اس اہم ملاقات کے موقع پر نائب وزیراعظم اسحاق ڈار، وفاقی وزیر احسن اقبال، مشیر ڈاکٹر توقیر شاہ اور سیکرٹری خارجہ آمنہ بلوچ بھی موجود تھے۔
جاری کردہ اعلامیے کے مطابق وزیراعظم شہباز شریف نے چین کے صدر شی جن پنگ اور وزیراعظم لی چیانگ کے لیے نیک خواہشات اور خیرسگالی کے جذبات کا اظہار کیا۔
خطے کی صورتحال پر تبادلہ خیال
ملاقات کے دوران مشرقِ وسطیٰ، افغانستان اور جنوبی ایشیا سمیت خطے کی مجموعی صورتحال زیرِ بحث آئی۔ وزیراعظم شہباز شریف نے پاکستان اور چین کے درمیان اسٹریٹجک شراکت داری مضبوط بنانے کے عزم کا اعادہ کرتے ہوئے کہا کہ دونوں ممالک کی قیادت کے مابین طے شدہ فیصلوں اور معاہدوں پر عملدرآمد کے لیے قریبی تعاون جاری رکھا جائے گا۔
چینی سفیر جیانگ ژائی ڈونگ نے کہا کہ چین، پاکستان کو اپنا آہنی بھائی سمجھتا ہے اور پاکستان کی خودمختاری و علاقائی سالمیت کے تحفظ کے لیے ہر ممکن تعاون جاری رکھے گا۔ انہوں نے مزید کہا کہ چین پاکستان کی سماجی و معاشی ترقی کے فروغ کے لیے بھی اپنا تعاون برقرار رکھے گا۔