خیبر پختونخوا کے ضلع سوات میں سکیورٹی فورسز نے انٹیلی جنس بیسڈ آپریشن کرتے ہوئے فتنہ الخوارج کے 4 دہشت گردوں کو ہلاک کر دیا اور اہم ترین پہاڑی چوٹی راشد سر ٹاپ کا کنٹرول حاصل کر لیا۔
ذرائع کے مطابق یہ کارروائی سوات کے علاقے مٹہ میں فتنہ الخوارج سے وابستہ دہشت گردوں کی موجودگی کی قابلِ اعتماد اطلاعات پر عمل میں لائی گئی۔
آپریشن کے دوران سکیورٹی فورسز اور دہشت گردوں کے درمیان شدید فائرنگ کا تبادلہ ہوا، جس کے بعد فورسز نے حکمتِ عملی کے تحت پیش قدمی کرتے ہوئے علاقے کی بلند ترین چوٹی راشد سر ٹاپ پر اپنا مکمل قبضہ قائم کر لیا۔
فائرنگ کے تبادلے میں 4 دہشت گرد ہلاک ہو گئے، جبکہ 4 دیگر دہشت گرد قریبی گھر میں پناہ لیے ہوئے ہیں۔ محصور دہشت گردوں نے گھر کے اہل خانہ کو انسانی ڈھال کے طور پر استعمال کرنا شروع کر دیا ہے۔
سیکیورٹی فورسز نے علاقے کو مکمل محاصرے میں لے کر یرغمالیوں کی محفوظ رہائی اور باقی ماندہ دہشت گردوں کو انجام تک پہنچانے کے لیے انتہائی محتاط انداز میں آپریشن جاری رکھا ہوا ہے۔
دیکھیے: افغانستان میں مزاحمت کا دائرہ وسیع، پنجشیر و بدخشاں کے بعد سرپل میں طالبان رہنما قتل
