افغان شمالی اتحاد کی معروف تنظیم یونائیٹڈ فرنٹ آف افغانستان کے سربراہ جنرل سمیع سادات نے افغان طالبان کے خلاف باقاعدہ عسکری جنگ کا آغاز کر دیا ہے، جبکہ تحریک کو مؤثر بنانے کے لیے امریکہ اور برطانیہ سے باقاعدہ سیاسی و سفارتی مدد مانگ لی ہے۔
ایک اہم ویڈیو پیغام میں جنرل سمیع سادات نے انکشاف کیا کہ ان کی فورسز نے طالبان کے گڑھ قندھار سے عسکری کارروائیوں کا آغاز کر دیا ہے، جس کا دائرہ جلد پورے افغانستان میں پھیلایا جائے گا۔
انہوں نے امریکہ، برطانیہ، نیٹو اور عالمی برادری سے مطالبہ کیا کہ وہ اس موقع پر درست رخ پر کھڑے ہوں اور طالبان کے خلاف اس جدوجہد میں ان کی سیاسی و سفارتی حمایت کریں۔
جنرل سمیع سادات نے واضح کیا کہ ان کی جنگ صرف طالبان تک محدود نہیں، بلکہ وہ خطے میں فعال دیگر عالمی دہشت گرد تنظیموں جیسے القاعدہ، داعش اور تحریکِ طالبان پاکستان کے خلاف بھی یکساں نبرد آزما ہیں۔
ہمسایہ ممالک کو اعتماد میں لیتے ہوئے ان کا کہنا تھا کہ وہ خطے کے کسی ملک کے لیے مسائل پیدا کرنا نہیں چاہتے بلکہ تمام پڑوسیوں کے ساتھ پرامن مستقبل کے خواہاں ہیں۔
سربراہ یونائیٹڈ فرنٹ نے عزم ظاہر کیا کہ ان کی فورسز تمام تر عسکری کارروائیوں کے دوران بین الاقوامی قوانین کی پاسداری کریں گی، تاہم اپنی دفاعی حکمتِ عملی کے لیے وہ کسی بھی بیرونی ملک کی اجازت کے پابند نہیں ہوں گے۔
دیکھیے: طالبان مخالف مزاحمت میں شدت؛ جنرل یاسین ضیا نے نئے افغانستان کا خاکہ پیش کر دیا
