ایرانی فوج نے دعویٰ کیا ہے کہ اس نے کویت اور متحدہ عرب امارات میں موجود امریکی فوجی اڈوں کو میزائلوں اور ڈرونز کے ذریعے نشانہ بنایا ہے۔
فرانسیسی خبر رساں ادارے اے ایف پی کے مطابق ایرانی فوج نے سرکاری ٹی وی پر جاری بیان میں بتایا کہ کویت کے احمد الجابر ایئر بیس پر امریکی فوج کے سیٹلائٹ مواصلاتی نظام، سامان کے گودام اور جنگی طیاروں کے ہینگرز کو نشانہ بنایا گیا۔
ایرانی فوج نے مزید بتایا کہ متحدہ عرب امارات کے المنہاد ایئر بیس پر موجود امریکی فوجی دستوں اور ریڈار نظام کو بھی میزائلوں اور ڈرونز سے نشانہ بنایا گیا۔
ایرانی حکام کے مطابق یہ کارروائی ان کے آپریشن ثاقب کے 31ویں مرحلے کا حصہ تھی، جو حالیہ امریکی حملوں کے جواب میں کی گئی۔
کویت کا سخت ردعمل
کویتی فوج نے تصدیق کی کہ اس کا فضائی دفاعی نظام ایرانی میزائل اور ڈرون حملوں کا مقابلہ کر رہا تھا۔ کویتی وزارتِ خارجہ نے ان حملوں کو ملکی خودمختاری کی کھلی خلاف ورزی قرار دیا۔
ایرانی فوج کے یہ دعوے ایسے وقت میں سامنے آئے ہیں جب امریکی صدر ڈونلڈ ٹرمپ ایران کے خلاف مزید کارروائی کی دھمکیاں دے رہے ہیں۔
صدر ٹرمپ کا کہنا ہے کہ آبنائے ہرمز پر امریکہ کا مکمل کنٹرول برقرار ہے اور روزانہ لاکھوں بیرل تیل اسی راستے سے منتقل ہو رہا ہے۔
امریکی حکام کی جانب سے تاحال ان حملوں میں ہونے والے ممکنہ جانی یا مالی نقصان کے بارے میں کوئی سرکاری تصدیق سامنے نہیں آئی۔
ایرانی فوج نے خبردار کیا ہے کہ امریکی کارروائیوں کے جواب میں مستقبل میں بھی ایسے حملے جاری رہیں گے۔
دیکھیے: ایران پر دوبارہ حملے کی تیاری، صدر ٹرمپ کا بڑا جنگی انتباہ
