امریکی صدر ڈونلڈ ٹرمپ نے ایران کے خلاف مزید فوجی کارروائی کا عندیہ دیتے ہوئے کہا ہے کہ امریکہ دوبارہ حملہ کرنے کے لیے تیار ہے اور ضرورت پڑنے پر کسی بھی وقت اقدام کر سکتا ہے۔
اوول آفس میں صحافیوں سے گفتگو کرتے ہوئے ڈونلڈ ٹرمپ نے ایران میں کیے گئے حالیہ امریکی حملوں کو انتہائی شدید اور مؤثر قرار دیا۔
امریکی صدر کے مطابق کارروائی کے دوران صرف ایرانی ریڈار سسٹمز کو ہی نشانہ نہیں بنایا گیا بلکہ دیگر اہم فوجی اہداف بھی تباہ کیے گئے۔
ٹرمپ نے واضح کیا کہ امریکہ نے ایران کے خلاف بہت بھاری حملہ کیا ہے اور واشنگٹن جب بھی مناسب سمجھے گا، دوبارہ کارروائی کرنے سے نہیں ہچکچائے گا۔
دوسری جانب امریکی اقدامات کے بعد مشرق وسطیٰ میں کشیدگی انتہائی تشویشناک حد تک بڑھ گئی ہے اور خطے میں بڑے تنازع کے بادل منڈلانے لگے ہیں۔
توقع ظاہر کی جا رہی ہے کہ ایران کی جانب سے امریکی مفادات یا اس کے علاقائی اتحادیوں کو جواباً نشانہ بنایا جا سکتا ہے، جس سے صورتحال مزید سنگین ہو سکتی ہے۔
دیکھیے: ایران کی جوابی کارروائی، اردن میں امریکی اڈے پر میزائل فائر
