خیبرپختونخوا اور بلوچستان میں سکیورٹی فورسز کی مختلف کارروائیوں کے دوران 17 دہشت گرد ہلاک ہوگئے۔ کارروائیوں کے دوران 6 جوان بھی شہید ہوئے۔
سکیورٹی ذرائع کے مطابق آپریشن ردالفتنہ 3 کے تحت بلوچستان میں دہشت گردوں کے خلاف کارروائیاں جاری ہیں۔ ضلع پنجگور کے علاقے فتح علی میں سکیورٹی فورسز نے انٹیلی جنس بنیادوں پر کارروائی کی۔
کارروائی کے دوران فتنہ الہندوستان کے 5 دہشت گرد ہلاک ہوئے۔ ہلاک دہشت گردوں کے قبضے سے بھاری مقدار میں اسلحہ اور گولہ بارود بھی برآمد کیا گیا۔
دوسری جانب ضلع کچھی کے علاقے ڈھاڈر میں سکیورٹی فورسز نے ایک اور کارروائی کی۔ انٹیلی جنس بنیادوں پر کی گئی کارروائی میں 2 دہشت گرد ہلاک ہوئے۔ متعدد دہشت گردوں کے زخمی ہونے کی بھی اطلاعات ہیں۔
خیبرپختونخوا میں 10 خوارج ہلاک
آئی ایس پی آر کے مطابق شمالی وزیرستان میں خوارج کی موجودگی کی اطلاع پر سکیورٹی فورسز نے انٹیلی جنس بنیادوں پر آپریشن کیا۔
اس دوران خوارج کے ٹھکانے کو مؤثر انداز میں نشانہ بنایا گیا۔ شدید فائرنگ کے تبادلے میں 6 خوارج ہلاک ہوگئے۔
ضلع ہنگو میں بھی سکیورٹی فورسز اور خوارج کے درمیان جھڑپ ہوئی۔ اس کارروائی میں مزید 4 خوارج ہلاک ہوئے۔
جوان شہید
آئی ایس پی آر کے مطابق 17 ستمبر کو سکیورٹی فورسز کے قافلے کو بارودی سرنگ کے ذریعے نشانہ بنایا گیا۔ آئی ای ڈی دھماکے کے نتیجے میں 6 جوان شہید ہوگئے۔
کارروائیوں کے دوران ہلاک خوارج کے قبضے سے اسلحہ اور گولہ بارود بھی برآمد کیا گیا۔ سکیورٹی فورسز نے علاقوں میں کلیئرنس آپریشن جاری رکھا ہوا ہے۔
سکیورٹی ذرائع کے مطابق بلوچستان میں دہشت گردوں کے مکمل خاتمے اور امن و امان کے قیام تک کارروائیاں جاری رہیں گی۔