پاکستان نے سعودی عرب کے شہر طائف پر حوثی باغیوں کے ڈرون حملے کی شدید الفاظ میں مذمت کی ہے۔ اس بزدلانہ کارروائی کے نتیجے میں ایک یمنی شہری جاں بحق ہوا ہے۔ حملے میں ایک سعودی شہری اور ایک پاکستانی شدید زخمی ہوئے ہیں۔
سعودی خودمختاری کی حمایت
ترجمان کے مطابق پاکستان سعودی عرب کی خود مختاری اور علاقائی سالمیت کی مکمل حمایت کرتا ہے۔ پاکستان برادر اسلامی ملک کے امن، سلامتی اور خوشحالی کے لیے شانہ بشانہ کھڑا ہے۔ پاکستانی عوام اور حکومت اس مشکل وقت میں سعودی عوام کے ساتھ مکمل یکجہتی کا اظہار کرتے ہیں۔
علاقائی امن کے لیے سنگین خطرہ
دفتر خارجہ نے واضح کیا کہ معصوم جانوں کو نشانہ بنانا انتہائی اشتعال انگیز عمل ہے۔ ایسے حملے علاقائی امن اور استحکام کے لیے سنگین خطرہ ہیں۔ ترجمان نے مطالبہ کیا کہ اس نوعیت کی تمام پرتشدد کارروائیاں فوری طور پر بند کی جائیں۔
مذاکرات کا مطالبہ
حوثی حملوں کا دائرہ آبنائے باب المندب اور ملحقہ خطوں تک پھیلنا انتہائی تشویشناک ہے۔ پاکستان خطے میں فوری کشیدگی میں کمی اور پائیدار امن کے قیام کے لیے بامقصد مذاکرات کی حمایت کرتا ہے۔ اقوام متحدہ کی نگرانی میں یمنی عوام کی قیادت میں جامع سیاسی عمل ہی دیرپا حل کا واحد راستہ ہے۔
دیکھیے: سعودی عرب کے دفاع کیلئے پاکستان کسی بھی حد تک جائے گا: ڈی جی آئی ایس پی آر
