ڈی جی آئی ایس پی آر لیفٹیننٹ جنرل احمد شریف چودھری نے کہا ہے کہ پاکستان سعودی عرب کے دفاع کیلئے کسی بھی حد تک جائے گا۔
عرب نیوز کو انٹرویو میں ڈی جی آئی ایس پی آر نے کہا کہ پاکستان سعودی عرب کے ساتھ سفارتی اور عملی طور پر مکمل کھڑا ہے۔ انہوں نے کہا کہ سعودی سلامتی کیلئے پاکستان کا عزم غیر مشروط ہے۔
لیفٹیننٹ جنرل احمد شریف چودھری نے کہا کہ پاکستان کا عزم مکہ مکرمہ اور مدینہ منورہ سمیت دونوں مقدس مقامات کے تحفظ تک پھیلا ہوا ہے۔ انہوں نے واضح کیا کہ پاکستان سعودی عرب کو کسی بھی جارحیت کے خلاف دفاع فراہم کرتا رہے گا۔
کشیدگی کم کرنے کی کوششیں
ڈی جی آئی ایس پی آر کے مطابق پاکستان سعودی قیادت سے مسلسل رابطے میں ہے۔ اس کے علاوہ خطے کی حکومتوں سے بھی مشاورت جاری ہے تاکہ موجودہ صورتحال کا مذاکرات اور پُرامن حل تلاش کیا جا سکے۔
انہوں نے کہا کہ پاکستان خطے میں کشیدگی کم کرنے کیلئے سفارتی کوششیں جاری رکھے گا۔
لیفٹیننٹ جنرل احمد شریف چودھری نے اسلام آباد مفاہمتی یادداشت کو موجودہ پیچیدہ فوجی صورتحال سے نکلنے کا راستہ قرار دیا۔
انہوں نے کہا کہ پاکستان واشنگٹن اور تہران کو دوبارہ مذاکرات کی میز پر لانے کیلئے مشترکہ بنیاد تلاش کر رہا ہے۔ تاہم، انہوں نے مذاکرات کی بحالی کیلئے کوئی حتمی وقت نہیں دیا۔
پاکستان، سعودی عرب اور ترکیہ کے درمیان اگست میں مکہ مشترکہ دفاعی معاہدہ بھی ہوا تھا۔ سرکاری مؤقف کے مطابق یہ معاہدہ دفاعی نوعیت کا ہے اور مشترکہ دفاع پر مبنی ہے۔
دیکھیے: فیلڈ مارشل عاصم منیر سے ایرانی وزیر خارجہ کا رابطہ، علاقائی امور پر گفتگو