پنجشیر کے علاقے ارزوی میں ایک عسکری کارروائی کے دوران طالبان کے زیرِ استعمال بھارتی ساختہ ہیلی کاپٹر کو مار گرانے کا دعویٰ سامنے آیا ہے۔ یہ دعویٰ افغان مزاحمتی گروہ افغان گرین ٹرینڈ کی جانب سے جاری کردہ تفصیلات میں کیا گیا ہے۔
افغان گرین ٹرینڈ کے مطابق اس کارروائی میں ہیلی کاپٹر پر سوار طالبان فضائیہ کے چیف آف اسٹاف ملا قبلہ اللہ مقیم شدید زخمی ہو گئے ہیں۔ ان کے ہمراہ پرواز میں موجود دو پائلٹ عبدالعظیم اور محمد نعیم بھی حملے کی زد میں آ کر شدید زخمی ہوئے۔
بیان میں مزید کہا گیا ہے کہ واقعے کے بعد زخمی چیف آف اسٹاف اور دونوں پائلٹوں کو ایک روسی ساختہ ایم آئی 17 ہیلی کاپٹر کے ذریعے فوری طور پر کابل منتقل کیا گیا۔ تباہ شدہ ہیلی کاپٹر کا ملبہ جائے وقوعہ پر ہی موجود رہا۔
مزاحمتی گروہ کے مطابق یہ کارروائی طالبان فضائیہ کے ایک اہم عسکری اثاثے پر کاری ضرب ہے۔ گروہ کا مؤقف ہے کہ اس واقعے نے طالبان کے فضائی نظام کی خامیاں آشکار کی ہیں اور پنجشیر میں ان پر مزاحمتی دباؤ میں مسلسل اضافے کو ظاہر کیا ہے۔
افغان گرین ٹرینڈ نے اپنے اعلامیے میں اس امر کی جانب بھی اشارہ کیا ہے کہ نشانہ بننے والا ہیلی کاپٹر بھارتی ساختہ تھا، جو اس خطے میں طالبان کے زیرِ تصرف غیر ملکی فوجی سازوسامان کے استعمال کی عکاسی کرتا ہے۔