گوجرانوالہ میں ولیمے کے دن دلہن صباء کے قتل کے مقدمے میں نامزد اس کی دوست عروب کو گرفتار کرلیا گیا ہے۔ تفتیشی حکام کے مطابق ملزمہ مرکزی ملزم سرفراز کی کزن بھی ہے۔
تفتیشی حکام کا کہنا ہے کہ ملزمہ عروب اور سرفراز کے اہل خانہ مبینہ واردات سے پہلے آگاہ تھے۔ ملزمان کو بیرون ملک فرار ہونے سے روکنے کے لیے قانونی کارروائی بھی مکمل کرلی گئی ہے۔
واضح رہے کہ گزشتہ ہفتے ہفتے کے روز ولیمے کی تقریب سے واپسی پر دلہن صباء کو فائرنگ کرکے قتل کردیا گیا تھا۔ واقعے کا مقدمہ مقتولہ کے والد کی مدعیت میں تین ملزمان کے خلاف درج کیا گیا تھا، جس میں عروب کو بھی نامزد کیا گیا تھا۔
پولیس کے مطابق مرکزی ملزم سرفراز مقتولہ سے شادی کرنا چاہتا تھا، تاہم لڑکی کے اہل خانہ نے رشتے سے انکار کردیا تھا۔
