لاہور کے علاقے نواب ٹاؤن میں چلتی موٹر سائیکل پر لڑکی کو مبینہ طور پر ہراساں کرنے والے آن لائن بائیک رائیڈر کو گرفتار کرلیا گیا۔
ڈی آئی جی آپریشنز لاہور کے مطابق واقعہ پیر کی شب پیش آیا، جب جوہر ٹاؤن سے رائیڈ بک کروانے والی لڑکی کو ملزم نے چلتی موٹر سائیکل پر ہراساں کیا۔ اس دوران لڑکی نے موٹر سائیکل سے چھلانگ لگا دی۔
موٹر سائیکل سے چھلانگ لگانے کے نتیجے میں لڑکی کے سر، ناک، گردن اور گھٹنے پر چوٹیں آئیں، جبکہ واقعے کے بعد ملزم موقع سے فرار ہوگیا تھا۔
متاثرہ لڑکی کے بھائی کی مدعیت میں ملزم کے خلاف مقدمہ درج کیا گیا، جس کے بعد پولیس نے کارروائی کرتے ہوئے اسے گرفتار کرلیا۔
