مارچ 1971ء کی ایک ہولناک صبح جب مشرقی پاکستان کے ریلوے قصبے سانتاہار کے باسیوں نے اپنے گھروں کی دہلیز پر قدم رکھا تو وہ اس بھیانک حقیقت سے بے خبر تھے کہ آنے والے چند ہفتوں میں ان کی ہنستی کھیلتی گلیاں ایک وسیع و عریض قبرستان میں بدلنے والی ہیں۔ یہ وہ اردو بولنے والے بدقسمت خاندان تھے جن کے بزرگ 1947ء میں ہندوستان کے صوبہ بہار اور دیگر علاقوں سے اپنا سب کچھ چھوڑ کر اس خطے میں اس مقدس خواب کے ساتھ آئے تھے کہ یہ نئی زمین ان کا اپنا اور محفوظ وطن ہوگی۔ تاریخ انہیں بہاری کے نام سے جانتی ہے، اور ان کی یہ خونچکاں داستان 1971ء کے اس باب کا وہ تاریک ترین ورق ہے جسے دانستہ طور پر فراموش کر دیا گیا ہے۔
سانتاہار کے در و دیوار اس المناک المیے کے گواہ ہیں جب 26 مارچ کو بنگالی قوم پرستوں اور اردو بولنے والوں کے درمیان خونی جھڑپیں شروع ہوئیں اور 27 مارچ تک حالات مکمل طور پر وحشت کی بھینٹ چڑھ گئے۔ خوف کے مارے بے بس لوگ چائی باغان کی جامع مسجد میں یہ سوچ کر پناہ لینے پہنچے کہ شاید خدا کے اس پاک گھر کے احترام میں کوئی ان پر ہاتھ اٹھانے کی جرات نہیں کرے گا۔ لیکن انسانیت سے عاری ایک مسلح ہجوم خدا کے گھر میں گھس گیا اور وہاں موجود ایک ایک فرد کو بے دردی سے تہہ تیغ کر دیا۔ 27 مارچ سے 17 اپریل تک یہ پورا قصبہ ظلم و بربریت کی ایسی گھناؤنی لپیٹ میں رہا جہاں لاشوں کے ڈھیر لگ گئے، جن کی تعداد چودہ سو سے لے کر ہزاروں تک بتائی جاتی ہے، جبکہ اس دوران عصمت دری کے ایسے دل دہلا دینے والے واقعات رونما ہوئے جنہیں سن کر روح کانپ اٹھتی ہے۔
چٹاگانگ کی سڑکیں بھی اسی بہیمانہ خون کی پیاسی تھیں۔ مارچ کے ابتدائی دنوں میں وہاں جو کچھ ہوا، محمد علاؤالدین جیسے زندہ بچ جانے والے عینی شاہدین کے سینوں میں آج بھی ایک ناسور کی طرح زندہ ہے۔ وہ لرزہ خیز مناظر یاد کرتے ہوئے بتاتے ہیں کہ انہوں نے اپنے ہاتھوں سے سر کٹی لاشیں اٹھا کر 45 بڑے ڈرموں میں بھریں اور لاتعداد لاشیں جو سڑکوں پر بے سہار پڑی تھیں، انہیں خود دفن کیا۔ یہ کسی مؤرخ کی خشک رپورٹ نہیں بلکہ ایک عام انسان کی وہ چیخ ہے جو تاریخ کے طاقچوں میں دب کر رہ گئی۔ علاؤالدین بتاتے ہیں کہ جب پاکستانی فوج مدد کے لیے پہنچی تو راستے میں ہر طرف رکاوٹیں کھڑی کی گئیں اور کئی بے گناہوں کو جان بچانے کے لیے گھروں کے تہہ خانے میں چھپانا پڑا۔
در دریائے روپسا کے پانیوں پر تیرتی لاشیں آج بھی اس جبر کی گواہی دیتی ہیں۔ کھلنا کے قریب اس دریا کے کنارے ایک بہاری عینی شاہد نے خبر رساں ادارے اے ایف پی کو بتایا کہ اس نے اپنی آنکھوں سے دریا میں کم از کم ایک سو معصوم بہاری بچوں کی لاشیں تیرتے ہوئے دیکھیں، جبکہ ظالم دندناتے ہوئے کشتیوں میں سوار ہو کر تیرتے ہوئے یا چھپے ہوئے زندہ بچ جانے والوں کو تلاش کر کے موت کے گھاٹ اتار رہے تھے۔ یہ ایک فرد کا بیان ضرور ہے، لیکن ایسے ان گنت بیانات ایک ایسا ہولناک نقشہ بناتے ہیں جو بتاتا ہے کہ کس طرح منظم طریقے سے ایک پوری نسل کو مٹانے کا کھیل کھیلا گیا۔
سب سے بڑا اور دل چیر دینے والا المیہ تو جنگ کے سرکاری طور پر تھم جانے کے بعد شروع ہوا۔ 16 دسمبر 1971ء کو جب ڈھاکہ کا سقوط ہوا، تو اس کے فوراً بعد سائرون نسا جیسے ہزاروں خاندانوں پر قیامت ٹوٹ پڑی۔ سولہ دسمبر کے اگلے روز ہونے والے حملے میں سائرون نسا کے شوہر، جواں سال بیٹے اور بیٹی سمیت گھر کے پندرہ افراد کو بے دردی سے قتل کر دیا گیا۔ وہ تو معجزانہ طور پر بچ گئیں، لیکن عمر بھر یہ تلخ نوحہ کرتی رہیں کہ ان کے ساتھ ہونے والی اس بربریت کا کبھی کسی عدالت میں نوٹس نہیں لیا گیا۔ ان تمام قتلِ عام اور گھناؤنے جرائم کے دستاویزی ثبوت موجود ہونے کے باوجود آج تک کسی بین الاقوامی یا مقامی سطح پر باقاعدہ تحقیقات یا انصاف کے دروازے نہیں کھلے۔
اس خونی کھیل کے بعد مظلوموں پر بے وطنی کا ایک اور عذاب نازل ہوا۔ نئے بننے والے ملک بنگلہ دیش میں ان بہاریوں کو شہریت کے حق سے یکسر محروم کر دیا گیا، ان کی املاک اور جائیدادیں جبراً چھین لی گئیں اور لاکھوں انسانوں کو اقوامِ متحدہ کی نگرانی میں قائم ہونے والے تاریک اور تنگ کیمپوں میں قیدیوں کی طرح رہنے پر مجبور کر دیا گیا۔ آج بھی ان کی دوسری اور تیسری نسلیں انہی بے آب و گیاہ کیمپوں میں کسمپرسی کی زندگی گزار رہی ہیں۔ علاؤالدین کا یہ دردناک جملہ دل چیر دیتا ہے کہ وہاں آج بھی چھ سے سات لاکھ ایسے لوگ موجود ہیں جو پاکستان کے پرچم کو سینے سے لگائے بیٹھے ہیں۔ جو خوش نصیب کسی طرح پاکستان پہنچ بھی گئے، انہیں یہاں بھی اپنوں کی بے رخی کا سامنا کرنا پڑا اور معاشرے کے اندر نئی مشکلات نے ان کا گھیراؤ کیے رکھا۔
اس پورے المیے میں ایک اور تلخ حقیقت یہ ہے کہ اس خطے میں باہر سے ان تمام سازشوں کے تانے بانے بونے میں بھارت کی خفیہ ایجنسیوں اور اس کی مکارانہ پالیسیوں کا بھی گہرا ہاتھ تھا۔ پاکستان کو کمزور کرنے اور مشرقی بازو کو کاٹنے کے لیے بھارت نے پہلے روز سے ہی سازشوں کے جال بنے، سازشی عناصر کو بھرپور اسلحہ اور تربیت فراہم کی، اور لسانی تعصبات کی اس ہانک کو ہوا دی جس نے لاکھوں انسانوں کا لہو بہا دیا۔ بھارت کی اس جارحانہ اور توسیع پسندانہ مداخلت نے اس پورے خطے کو ایک ایسی آگ میں جھونک دیا جہاں عام انسانوں، بالخصوص اس بے گناہ اردو بولنے والی اقلیت کو ایندھن کے طور پر استعمال کیا گیا، جو دو قومی نظریے اور پاکستان سے محبت کی پاداش میں اس سفاکانہ ریاستی اور ہجوم کے تشدد کا نشانہ بنی۔
لاشوں کی گنتیاں کرنے والے اداروں اور محققین میں آج بھی تنازع ہے۔ جہاں بعض ذرائع ہلاکتوں کی تعداد ایک ہزار بتاتے ہیں، وہیں بنگالی ذرائع چند ہزار سے تیس چالیس ہزار تک کا اعتراف کرتے ہیں، اور پاکستانی حکومت کے وائٹ پیپر میں چونسٹھ ہزار کا ذکر ملتا ہے۔ اس کے برعکس، مؤرخ آر جے رمل ڈیڑھ لاکھ اموات کو معقول اندازہ مانتے ہیں، جبکہ جون 1971ء میں خود بہاری نمائندوں نے پانچ لاکھ افراد کے قتل کا دعویٰ کیا تھا۔ اعداد و شمار کے اس اتنے بڑے فرق سے صاف ظاہر ہوتا ہے کہ کبھی کسی غیر جانبدار ادارے نے اس انسانی المیے کی سچی گنتی کرنے کی زحمت ہی گوارا نہیں کی۔ بنگلہ دیش کے سرکاری بیانیے میں اس منظم نسل کشی کو محض “الگ تھلگ ہجومی تشدد” کہہ کر مٹی ڈالی جاتی ہے، جسے شرمیلا بوس جیسے محققین نے سرسری اور انکار کی کیفیت قرار دیا ہے۔
یہ بات بھی اتنی ہی سچ ہے کہ اس خونریز جنگ میں بنگالی شہریوں پر بھی ظلم کے پہاڑ توڑے گئے، اور بہاری برادری کے کچھ افراد نے حالات کی مجبوری یا نظریاتی وابستگی کے تحت الشمس، البدر اور رضاکار جیسی تنظیموں میں شامل ہو کر فوجی کارروائیوں میں حصہ لیا۔ لیکن اس ایک سچ کی آڑ میں یہ طعنہ دے کر ہر بہاری کو مجرم قرار دینا اور مسجد میں پناہ لینے والے معصوم بچوں اور عورتوں کے قتلِ عام کو جائز قرار دینا انسانیت کا سب سے بڑا گناہ ہے۔ یہ دونوں تلخ سچ تاریخ کے اس ورق پر ساتھ ساتھ لکھے ہیں، اور کوئی ایک سچ دوسرے سچ کے خون کو دھو نہیں سکتا۔
آج اصل المیہ یہ ہے کہ یہ بدقسمت بہاری دونوں طرف کی تاریخ میں اجنبی اور بے نام بن چکے ہیں۔ بنگلہ دیش کے قومی بیانیے میں وہ شکست خوردہ اور غدار کے خانے میں ڈال دیے گئے اس لیے ان کا سارا دکھ اور درد حاشیے پر دھکیل دیا گیا، اور پاکستان میں ان کا ذکر صرف سیاسی بیانات تک محدود ہو کر رہ گیا جبکہ ان کی دہائیوں پر محیط کیمپوں کی کسمپرسی اور بے وطنی کا کوئی پرُپرساں نہیں۔ علاؤالدین کا وہ جملہ کہ “ہم نے تو سوچا تھا کہ مرنا تو ہے ہی، تو کیوں نہ ملک کے لیے جان دی جائے” آج بھی اس پوری برادری کی اس روح کی آواز ہے جس نے اپنی اٹوٹ وفاداری کی قیمت اپنی جان، عزت، گھر اور شناخت کی صورت میں چکائی ہے۔
سانتاہار کی مسجد کے وہ شہید، دریائے روپسا کے پانیوں میں ڈوبنے والے وہ معصوم بچے، اور چٹاگانگ کی سڑکوں پر پڑی وہ گمنام لاشیں کسی سیاسی سودے بازی یا تخت و تاج کے مہرے نہیں تھے، وہ گوشت پوست کے انسان تھے۔ ان کی یاد اور ان کے خون کا حساب کسی ایک قوم یا کسی مخصوص بیانیے کی ملکیت نہیں۔ جب تک تاریخ کے ان گمنام ورقوں کو صاف کر کے ان کا نام نہیں لیا جاتا، ان پر ہونے والے مظالم کی غیر جانبدارانہ تحقیق نہیں کی جاتی اور زندہ بچ جانے والوں کو انسانی حقوق اور شناخت نہیں دی جاتی، تب تک 1971ء کی تاریخ ہمیشہ ادھوری اور داغدار رہے گی۔





