کوآرڈینیٹر پیغامِ امن کمیٹی خیبرپختونخوا مولانا طیب قریشی نے اعلان کیا ہے کہ کمیٹی کا پیغام صوبے کے تمام اضلاع اور تحصیلوں تک پہنچایا جائے گا۔ اس مہم کا مقصد امن، برداشت اور قومی یکجہتی کو فروغ دینا اور دہشت گردی و انتہا پسندی کے خلاف اجتماعی کوششوں کو مضبوط بنانا ہے۔
مولانا طیب قریشی نے یہ اعلان دورۂ بونیر کے دوران کیا۔ انہوں نے کہا کہ ضلعی اور تحصیل سطح پر رابطہ کاری کے ذریعے معاشرے میں رواداری، بھائی چارے اور قومی ہم آہنگی کو فروغ دیا جائے گا۔
انہوں نے خیبرپختونخوا پولیس اور دیگر قانون نافذ کرنے والے اداروں کی قربانیوں کو خراجِ تحسین پیش کرتے ہوئے کہا کہ امن و امان کے قیام اور دہشت گردی کے خلاف جنگ میں ان کی خدمات پوری قوم کے لیے باعثِ فخر ہیں۔
مولانا طیب قریشی کا کہنا تھا کہ دہشت گردی اور انتہا پسندی کے خلاف قومی اتحاد ناگزیر ہے۔ معاشرے کے تمام طبقات کو امن کے فروغ اور قومی بیانیے کی مضبوطی کے لیے اپنا کردار ادا کرنا ہوگا۔
انہوں نے اس عزم کا اظہار کیا کہ پیغامِ امن کمیٹی کی سرگرمیاں صرف اعلانات تک محدود نہیں رہیں گی بلکہ صوبے کے مختلف اضلاع اور تحصیلوں میں عملی رابطہ کاری کے ذریعے امن اور برداشت کا پیغام عام کیا جائے گا۔





