کابل: عالمی خوشی رپورٹ 2026 کے مطابق افغانستان ایک بار پھر دنیا کا سب سے کم خوش ملک قرار پایا ہے، جبکہ فن لینڈ مسلسل نویں سال دنیا کا خوش ترین ملک بن گیا ہے۔
رپورٹ کے مطابق افغانستان 147ویں اور آخری نمبر پر رہا، جبکہ اس سے اوپر سیرا لیون اور مالدووا کا نمبر آیا۔ افغانستان گزشتہ سال بھی اسی فہرست میں آخری نمبر پر تھا۔
رپورٹ میں بتایا گیا ہے کہ افغان شہریوں میں مثبت جذبات کی سطح سب سے کم جبکہ منفی جذبات کی سطح بلند ترین رہی۔ خاص طور پر افغان خواتین کی زندگی سے اطمینان کی اوسط شرح صرف 1.26 رہی، جو عالمی سطح پر سب سے کم ہے۔
دوسری جانب فن لینڈ پہلے نمبر پر رہا، جبکہ آئس لینڈ اور ڈنمارک بالترتیب دوسرے اور تیسرے نمبر پر رہے۔ کوسٹا ریکا اور سویڈن چوتھے اور پانچویں نمبر پر شامل ہیں۔
خطے کے دیگر ممالک میں پاکستان 104ویں اور ایران 97ویں نمبر پر رہا، دونوں ممالک معاشی اور سماجی چیلنجز کے باعث نچلے حصے میں شامل ہیں۔
رپورٹ کے مطابق درجہ بندی شہریوں کی خود رپورٹ کردہ زندگی کے معیار پر مبنی ہوتی ہے، جس میں فی کس آمدن، سماجی تعاون، صحت، آزادی، فیاضی اور بدعنوانی کے تاثر جیسے عوامل شامل ہوتے ہیں۔
ماہرین کے مطابق افغانستان میں مسلسل تنازعات، معاشی مشکلات اور بنیادی سہولیات کی کمی نے عوام کی زندگی کو شدید متاثر کیا ہے، جبکہ رپورٹ میں شہریوں کے معیارِ زندگی بہتر بنانے کیلئے فوری اقدامات کی ضرورت پر زور دیا گیا ہے۔
