فیلڈ مارشل سید عاصم منیر نے کہا ہے کہ بلوچستان کے عوام کا امن، خوشحالی اور فلاح و بہبود ریاستی کوششوں کا مرکزی محور ہے۔
آئی ایس پی آر کے مطابق فیلڈ مارشل سید عاصم منیر نے ہفتے کو کوئٹہ گیریژن کا دورہ کیا۔ اس موقع پر انہوں نے فیلڈ فارمیشنز کے کمانڈرز اور کمانڈنگ افسران سے ملاقات کی۔
دورے کے دوران فیلڈ مارشل کو بلوچستان کی موجودہ سیکیورٹی صورتحال پر بریفنگ دی گئی۔ انہیں صوبے میں امن و استحکام کے لیے جاری اقدامات سے بھی آگاہ کیا گیا۔
اس کے علاوہ آپریشنل تیاریوں کا بھی جائزہ لیا گیا۔ ادارہ جاتی رابطہ کاری اور بلوچستان کی سماجی و اقتصادی ترقی کے لیے معاونت سے متعلق امور بھی زیر بحث آئے۔
پیشہ ورانہ صلاحیتوں کو سراہا
فیلڈ مارشل سید عاصم منیر نے فوجی جوانوں کی اعلیٰ پیشہ ورانہ صلاحیتوں اور آپریشنل تیاری کو سراہا۔ انہوں نے جوانوں کے بے لوث عزم کی بھی تعریف کی۔
مزید برآں، فیلڈ مارشل نے قانون نافذ کرنے والے اداروں اور دیگر ریاستی اداروں کے درمیان مسلسل رابطہ کاری کی اہمیت پر زور دیا۔ انہوں نے کہا کہ بلوچستان میں مستحکم اور محفوظ ماحول ترقیاتی منصوبوں اور معاشی مواقع کے فروغ میں مددگار ثابت ہوگا۔
فیلڈ مارشل سید عاصم منیر نے بلوچستان میں امن کے لیے جانوں کا نذرانہ پیش کرنے والے شہداء کو خراجِ عقیدت پیش کیا۔ انہوں نے افسران اور جوانوں کی فرائض کی ادائیگی میں ثابت قدمی اور لگن کو بھی سراہا۔
آئی ایس پی آر کے مطابق کوئٹہ گیریژن آمد پر فیلڈ مارشل سید عاصم منیر کا استقبال کور کمانڈر کوئٹہ نے کیا۔
