ڈیرہ اسماعیل خان کے علاقہ ڈومیل بیزن خیل میں عسکریت پسندوں اور مقامی امن کمیٹی کے درمیان ہونے والی فائرنگ کے تبادلے میں ایک پولیس اہلکار شہید ہوگیا جبکہ متعدد عسکریت پسندوں کے ہلاک اور زخمی ہونے کی اطلاعات ہیں۔
تفصیلات کے مطابق عسکریت پسندوں نے ڈومیل بیزن خیل میں مین روڈ پر ناکہ بندی کر رکھی تھی، جس کے بعد مقامی امن کمیٹی اور عسکریت پسندوں کے درمیان جھڑپ شروع ہوئی۔ فائرنگ کے تبادلے میں سب ڈویژن وزیر میں تعینات صدام نامی پولیس اہلکار موقع پر ہی شہید ہو گئے۔
اطلاع ملتے ہی پولیس کی بھاری نفری فوری طور پر موقع پر پہنچی، اور اس وقت جائے وقوعہ کے قرب و جوار میں آپریشن جاری ہیں۔
ضلعی پولیس ترجمان کے مطابق مزید تفتیش جاری ہے اور علاقے میں امن و امان کو برقرار رکھنے کے لیے فوری اقدامات کیے گئے ہیں۔
یہ واقعہ ڈی آئی خان اور بنوں کے حساس علاقوں میں سکیورٹی صورتحال کے تسلسل کی نشاندہی کرتا ہے، جہاں عسکریت پسند سرگرمیاں جاری ہیں۔