لاہور: پاکستان کرکٹ بورڈ نے معاہدے کی خلاف ورزی پر سخت ایکشن لیتے ہوئے سری لنکن آل راؤنڈر داسن شناکا پر پاکستان سپر لیگ میں ایک سال کے لیے پابندی عائد کر دی ہے۔
پی سی بی کے مطابق داسن شناکا کو پی ایس ایل سیزن 11 کے لیے لاہور قلندرز نے سائن کیا تھا، تاہم انہوں نے ایونٹ شروع ہونے سے قبل دستبرداری اختیار کر لی، جو معاہدے کی واضح خلاف ورزی قرار دی گئی۔ اس اقدام کے بعد انہیں اگلے ایڈیشن، یعنی پی ایس ایل 12 میں شرکت کے لیے نااہل قرار دے دیا گیا ہے۔
بورڈ کا کہنا ہے کہ لیگ کے قوانین اور معاہدوں کی پاسداری یقینی بنانا ضروری ہے تاکہ ٹورنامنٹ کی ساکھ اور معیار برقرار رکھا جا سکے، اسی لیے خلاف ورزی پر کارروائی ناگزیر تھی۔
دوسری جانب داسن شناکا نے اپنے فیصلے پر افسوس کا اظہار کرتے ہوئے پاکستان کرکٹ بورڈ، لاہور قلندرز، شائقین اور پوری کرکٹ کمیونٹی سے معذرت کی ہے۔ ان کا کہنا تھا کہ پی ایس ایل ایک باوقار لیگ ہے اور ان کے اقدام سے شائقین کو مایوسی ہوئی، جس پر وہ دل سے شرمندہ ہیں۔
شناکا نے وضاحت دی کہ دستبرداری کے وقت ان کا کسی دوسرے ٹورنامنٹ میں شرکت کا ارادہ نہیں تھا، اور انہوں نے ہمیشہ پاکستان میں کرکٹ کھیلنے کو سراہا ہے۔ انہوں نے امید ظاہر کی کہ وہ مستقبل میں نئی لگن کے ساتھ پی ایس ایل میں واپسی کر سکیں گے۔
پی سی بی حکام کے مطابق اس فیصلے کا مقصد دیگر کھلاڑیوں کے لیے بھی واضح پیغام دینا ہے کہ لیگ کے معاہدوں کی خلاف ورزی کسی صورت برداشت نہیں کی جائے گی۔
دیکھئیے:پی ایس ایل 11: ملتان سلطانز کی کراچی کنگز کے خلاف 11 رنز سے سنسنی خیز فتح