کراچی: پاکستان سپر لیگ (پی ایس ایل) سیزن 11 کے 28ویں میچ میں ملتان سلطانز نے سنسنی خیز مقابلے کے بعد کراچی کنگز کو 11 رنز سے شکست دے دی۔
نیشنل اسٹیڈیم کراچی میں کھیلے گئے میچ میں کراچی کنگز نے ٹاس جیت کر پہلے فیلڈنگ کا فیصلہ کیا، تاہم ملتان سلطانز نے جارحانہ بیٹنگ کا مظاہرہ کرتے ہوئے مقررہ 20 اوورز میں 7 وکٹوں کے نقصان پر 207 رنز بنا ڈالے۔
ملتان کی جانب سے شان مسعود نے 46 رنز کی ذمہ دارانہ اننگز کھیلی، جبکہ جوش فلپی 44 اور اویس ظفر 36 رنز بنا کر نمایاں رہے۔ کراچی کنگز کے خوشدل شاہ نے شاندار بولنگ کرتے ہوئے 3 وکٹیں حاصل کیں۔
208 رنز کے ہدف کے تعاقب میں کراچی کنگز نے بھرپور مقابلہ کیا، تاہم مقررہ اوورز میں 196 رنز تک ہی محدود رہی۔ کراچی کی جانب سے ریزا ہینڈرکس 49 رنز کے ساتھ نمایاں رہے، جبکہ عباس آفریدی نے 34 اور معین علی نے 27 رنز اسکور کیے۔
ملتان سلطانز کے عرفات منہاس نے عمدہ بولنگ کا مظاہرہ کرتے ہوئے 3 کھلاڑیوں کو آؤٹ کیا، جبکہ پیٹر سڈل نے 2 وکٹیں حاصل کیں اور ٹیم کی فتح میں اہم کردار ادا کیا۔
اس کامیابی کے ساتھ ملتان سلطانز نے ایونٹ میں اپنی پوزیشن مستحکم کر لی، جبکہ کراچی کنگز کو ایک اور قریبی مقابلے میں شکست کا سامنا کرنا پڑا۔
دیکھئیے:پی ایس ایل 11: کوئٹہ گلیڈی ایٹرز نے لاہور قلندرز کو 6 وکٹوں سے باآسانی شکست دے دی