سوشل میڈیا پر پاکستان اور اس کے قومی اداروں کے خلاف اے آئی کے ذریعے تیار کردہ ایک گمراہ کن اور جعلی ویڈیو پھیلائے جانے کا انکشاف ہوا ہے، جس پر وزارتِ اطلاعات و نشریات نے فوری طور پر باضابطہ فیکٹ چیک اور الرٹ جاری کر دیا ہے۔
وزارتِ اطلاعات کے مطابق سوشل میڈیا پر پھیلی اس جعلی ویڈیو میں ایک صارف ساجد یوسف شاہ کے فرضی ٹویٹ کو بنیاد بنایا گیا ہے۔ ٹویٹ میں یہ من گھڑت دعوی کیا گیا تھا کہ وفاقی وزیر اطلاعات عطاء اللہ تارڑ نے کسی امریکی ڈیجیٹل نیٹ ورک یا بوٹ فارمز کا سنسنی خیز انکشاف کیا ہے، جبکہ حقیقت میں ایسا کوئی بیان جاری نہیں ہوا ہے۔
تحقیقات سے معلوم ہوا ہے کہ مذکورہ ویڈیو مصنوعی ذہانت یعنی ڈیپ فیک ٹیکنالوجی کا استعمال کرتے ہوئے تیار کی گئی ہے۔ اس میں وفاقی وزیر اطلاعات، وفاقی وزیر قانون اور وزیراعظم کے کوآرڈینیٹر کی آواز اور ویڈیو میں ردوبدل کر کے ان سے منسوب ایسی گفتگو شامل کی گئی ہے جو انہوں نے کبھی کی ہی نہیں تھی۔
رپورٹ میں واضح کیا گیا ہے کہ اس پراپیگنڈا مہم کا بنیادی مقصد عوام میں سنسنی اور تشویش پھیلانا ہے۔ وفاقی وزرا کی جانب سے کسی غیر ملکی ڈیجیٹل نیٹ ورک یا بوٹ فارمز کے بے نقاب ہونے کے تمام دعوے بالکل بے بنیاد اور من گھڑت ہیں۔
حکومتی ذرائع نے عوام اور تمام سوشل میڈیا صارفین سے اپیل کی ہے کہ وہ بغیر تصدیق کسی بھی قسم کی ویڈیو یا خبر کو شیئر کرنے سے گریز کریں۔ اس قسم کے مواد کو آگے بڑھانا غیر ملکی پروپیگنڈے کا حصہ بننے کے مترادف ہے، لہٰذا ایسی ویڈیوز کی فوری نشاندہی کر کے انہیں رپورٹ کیا جائے۔
