کراچی: اداکارہ و میزبان فضا علی نے متنازع ویڈیو پر پیمرا کے نوٹس کے بعد عوام سے معافی مانگ لی، جبکہ وضاحت میں کہا ہے کہ یہ واقعہ شو کے دوران ایک فیملی لمحہ تھا جو ان کی بیٹی کی درخواست پر پیش آیا، تاہم اس معاملے پر حکومتی اور شوبز حلقوں کی جانب سے شدید تنقید بھی سامنے آئی ہے۔
تفصیلات کے مطابق حال ہی میں سوشل میڈیا پر فضا علی کے پروگرام کا ایک کلپ وائرل ہوا، جس میں ان کے شوہر اعجاز خان نے لائیو شو کے دوران انہیں کندھے پر اٹھا لیا تھا۔ ویڈیو میں ان کی بیٹی فراَل بھی موجود تھی، جس کے بارے میں فضا علی نے کہا کہ یہ سب اس کی درخواست پر ہوا۔
ویڈیو سامنے آنے کے بعد مختلف حلقوں کی جانب سے شدید ردعمل دیکھنے میں آیا اور سوشل میڈیا صارفین نے تنقید کرتے ہوئے پیمرا سے شو کے خلاف کارروائی کا مطالبہ کیا۔ بعد ازاں پیمرا نے معاملے کا نوٹس لیا۔
ذرائع کے مطابق مسلم لیگ (ن) کی رہنما اور صوبائی وزیر عظمیٰ بخاری نے بھی اس ویڈیو پر سخت تنقید کی اور اسے غیر مناسب قرار دیا۔ ان کا کہنا تھا کہ ریٹنگ کے حصول کے لیے اس حد تک جانا افسوسناک ہے۔ اسی طرح دیگر معروف شخصیات اور شوبز حلقوں کی جانب سے بھی میزبان کے طرزِ عمل پر سوالات اٹھائے گئے۔
فضا علی نے فیس بک پر ویڈیو بیان جاری کرتے ہوئے کہا کہ یہ ایک ہلکا پھلکا فیملی لمحہ تھا جو اچانک پیش آیا اور اس کا کوئی منفی مقصد نہیں تھا، تاہم اگر اس سے کسی کی دل آزاری ہوئی ہے تو وہ معذرت خواہ ہیں۔
انہوں نے کہا کہ وہ اپنے ناظرین کی عزت کرتی ہیں اور آئندہ بھی اپنے کام کو بہتر بنانے کی کوشش جاری رکھیں گی۔
واضح رہے کہ پیمرا کی جانب سے نوٹس کے بعد اس معاملے پر مزید کارروائی کا امکان بھی ظاہر کیا جا رہا ہے۔
دیکھئیے:فواد خان اور عائزہ خان پہلی بار سکرین پر ایک ساتھ جلوہ گر ہوں گے