لاہور: پاکستان سپر لیگ کے پہلے مرحلے کے مقابلے میں حیدرآباد کنگز مین نے ملتان سلطانز کو آٹھ وکٹوں سے شکست دے کر ٹورنامنٹ سے باہر کر دیا۔ قذافی اسٹیڈیم میں کھیلے گئے میچ میں حیدرآباد نے ٹاس جیت کر ملتان سلطانز کو پہلے بیٹنگ کی دعوت دی۔
ملتان سلطانز نے شان مسعود کی بہترین بیٹنگ کی بدولت مقررہ بیس اوورز میں نو وکٹوں کے نقصان پر ایک سو انسٹھ رنز بنائے۔ شان مسعود چھیالیس گیندوں پر انہتر رنز بنا کر نمایاں رہے۔ اس کے علاوہ صاحبزادہ فرحان پندرہ، اسٹیو اسمتھ تیرہ اور محمد نواز اٹھارہ رنز بنا سکے۔
حیدرآباد کنگز مین کی جانب سے محمد علی، حنین شاہ اور عاکف جاوید نے دو، دو کھلاڑیوں کو آؤٹ کیا۔ جواب میں حیدرآباد نے ایک سو ساٹھ رنز کا ہدف دو وکٹوں کے نقصان پر سولہویں اوور میں مکمل کر لیا۔
حیدرآباد کے معاذ صداقت چونسٹھ رنز بنا کر ناٹ آؤٹ رہے جبکہ عثمان خان نے پینتیس گیندوں پر چونسٹھ رنز کی اننگز کھیلی۔ صائم ایوب نے ناقابلِ شکست پندرہ رنز بنائے۔ اس شکست کے بعد ملتان سلطانز کا ٹورنامنٹ کا سفر اختتام پذیر ہو گیا۔
دوسری جانب حیدرآباد کنگز مین جمعے کے روز دوسرے مرحلے کے مقابلے میں اسلام آباد یونائیٹڈ کا سامنا کرے گی، اور یہ میچ جیتنے والی ٹیم فائنل میں پشاور زلمی کے خلاف میدان میں اترے گی۔ یاد رہے کہ پشاور زلمی نے پچھلے روز کوالیفائر میں اسلام آباد کو شکست دے کر فائنل کے لیے کوالیفائی کیا تھا۔
دیکھئیے:فیفا کا تاریخی فیصلہ؛ افغان مہاجرین ویمنز ٹیم کو عالمی فٹ بال مقابلوں میں شرکت کی اجازت دے دی گئی