اسلام آباد کی انسداد دہشت گردی عدالت نے روڈ بلاک کرنے اور پولیس سے جھگڑے کے مقدمے میں ایمان مزاری اور ہادی علی چٹھہ کی ضمانت منظور کر لی۔
انسداد دہشت گردی عدالت کے جج ابوالحسنات محمد ذوالقرنین نے کیس کی سماعت کی۔ اس موقع پر پولیس نے مقدمے کا ریکارڈ عدالت میں پیش کیا۔
سماعت کے دوران ریاستی وکیل علی آزاد نے عدالت کو بتایا کہ مقدمے کا ریکارڈ پیش کر دیا گیا ہے۔
اس پر جج ابوالحسنات محمد ذوالقرنین نے ریمارکس دیے کہ اگر آج بھی ریکارڈ پیش نہ ہوتا تو وہ اس معاملے پر کارروائی کرتے۔
بعد ازاں جج نے ملزمان کے وکلا سے مؤقف پوچھا، تاہم مزید دلائل سنے بغیر دونوں کی ضمانت منظور کر لی۔
عدالت نے ایمان مزاری اور ہادی علی چٹھہ کی 5، 5 ہزار روپے کے مچلکوں کے عوض ضمانت منظور کی۔
جج نے پولیس کو شوکاز نوٹس سے متعلق معاملہ بھی دیکھنے کی ہدایت کی۔
دیکھیے: انڈونیشیا: ایک ہی ماہ میں ہزاروں اموات، آخر وجہ کیا بنی؟
