ایرانی وزیرِ خارجہ سید عباس عراقچی نے مشرقِ وسطیٰ کی حالیہ صورتحال اور پاکستان کی ثالثی کی کوششوں کے حوالے سے امریکی میڈیا کی رپورٹس کو سختی سے مسترد کر دیا ہے۔ ایکس پر جاری اپنے ایک اہم بیان میں ایرانی وزیرِ خارجہ نے واضح کیا کہ امریکی ذرائع ابلاغ کی جانب سے ایران کے موقف کو غلط رنگ میں پیش کیا جا رہا ہے۔
اسلام آباد میں مذاکرات
سید عباس عراقچی نے اپنے بیان میں پاکستان کے لیے خصوصی طور پر ممنونیت کا اظہار کرتے ہوئے کہا کہ “ہم پاکستان کی جانب سے کی جانے والی امن کوششوں کے تہہِ دل سے شکر گزار ہیں اور ہم نے اسلام آباد جانے سے کبھی انکار نہیں کیا۔” ان کا یہ بیان ان افواہوں کے جواب میں سامنے آیا ہے جن میں دعویٰ کیا جا رہا تھا کہ ایران پاکستان کی میزبانی میں ہونے والے مذاکرات سے کترار ہا ہے۔
جنگ کا خاتمہ اور ایرانی شرائط
ایرانی وزیرِ خارجہ نے ایران کی ترجیحات پر روشنی ڈالتے ہوئے کہا کہ تہران کے لیے سب سے اہم چیز ان شرائط کا تعین ہے جو ایران پر مسلط کردہ ‘غیر قانونی جنگ’ کے ایک حتمی اور پائیدار خاتمے کی ضمانت دے سکیں۔ انہوں نے واضح کیا کہ ایران محض عارضی حل کے بجائے ایک ایسا نتیجہ چاہتا ہے جو خطے میں طویل مدتی استحکام کا باعث بنے۔
‘پاکستان زندہ باد’ کا نعرہ ایرانی وزیرِ خارجہ کے اس پیغام کی سب سے نمایاں بات اس کا اختتام تھا، جہاں انہوں نے اردو زبان میں “پاکستان زندہ باد” لکھ کر دونوں ممالک کے درمیان گہرے دوستانہ اور برادرانہ تعلقات کا ثبوت دیا۔ سفارتی حلقوں میں اس اقدام کو پاکستان کی کامیاب خارجہ پالیسی اور تہران کے اسلام آباد پر بڑھتے ہوئے اعتماد کی علامت قرار دیا جا رہا ہے۔
ماہرینِ خارجہ امور کا کہنا ہے کہ عباس عراقچی کے اس بیان سے یہ واضح ہو گیا ہے کہ ایران خطے میں امن کی بحالی کے لیے پاکستان کے کلیدی کردار کو تسلیم کرتا ہے اور امریکی میڈیا کی جانب سے پھیلائے جانے والے منفی پروپیگنڈے کے باوجود تہران اور اسلام آباد کے درمیان سفارتی رابطے انتہائی مضبوط ہیں۔
