ایران کے وزیر داخلہ اسکندر مومنی نے اپنے دورۂ پاکستان کے دوران وزیر مملکت برائے داخلہ طلال چوہدری کے ہمراہ پاکستان مونومنٹ کا دورہ کیا۔
اسلام آباد کے سیاحتی مقام شکرپڑیاں پر قائم اس یادگار کے دورے کے موقع پر فیڈرل کانسٹیبلری کے چاق و چوبند دستے نے ایرانی وزیر داخلہ کو گارڈ آف آنر پیش کیا۔
دورے کے دوران اسکندر مومنی نے یادگارِ شہداء پر حاضری دی، پھول رکھے اور فاتحہ خوانی کی۔ اس موقع پر انہوں نے وطن کی خاطر جانوں کا نذرانہ پیش کرنے والے شہداء کی عظیم قربانیوں کو خراجِ عقیدت پیش کیا۔
ایرانی وزیر داخلہ نے پاکستان مونومنٹ کا بھی دورہ کیا، جہاں انہیں یادگار اور اس کی تاریخی اہمیت کے حوالے سے بریفنگ دی گئی۔ اس موقع پر انہوں نے پاکستان مونومنٹ اور یادگارِ شہداء کی تاریخی و قومی اہمیت کو سراہتے ہوئے ان کی منفرد حیثیت کی تعریف کی۔
بعد ازاں اسکندر مومنی نے شکرپڑیاں سے اسلام آباد شہر اور مارگلہ پہاڑی سلسلے کا نظارہ بھی کیا۔
واضح رہے کہ ایرانی وزیر داخلہ اسکندر مومنی اپنے دورۂ پاکستان کے دوران وزیراعظم شہباز شریف اور فیلڈ مارشل عاصم منیر سے بھی اہم ملاقاتیں کریں گے۔