نائب وزیراعظم و وزیر خارجہ اسحاق ڈار اور سعودی عرب کے وزیر خارجہ شہزادہ فیصل بن فرحان آل سعود کے درمیان ٹیلیفونک رابطہ ہوا۔ رابطے کے دوران خطے کی تازہ صورتحال اور دوطرفہ تعلقات پر تفصیلی تبادلہ خیال کیا گیا۔
دفتر خارجہ کے ترجمان کے مطابق دونوں رہنماؤں نے پاکستان اور سعودی عرب کے درمیان قریبی، برادرانہ اور دیرینہ تعلقات کا اعادہ کیا۔ اس دوران باہمی تعاون کو مزید مضبوط بنانے کے عزم کا بھی اظہار کیا گیا۔ گفتگو کے دوران علاقائی پیشرفت پر بھی تبادلہ خیال کیا گیا۔
اس موقع پر اس بات پر زور دیا گیا کہ خطے میں امن، استحکام اور تعمیری روابط کے فروغ کے لیے سفارتی کوششوں کا تسلسل ناگزیر ہے۔
دونوں وزرائے خارجہ نے باہمی مشاورت جاری رکھنے کے عزم کا اظہار کیا۔ ساتھ ہی خطے میں امن و استحکام کے لیے مشترکہ تعاون کو مزید فروغ دینے کے عزم کا بھی اعادہ کیا گیا۔