مقبوضہ جموں و کشمیر کے ضلع کشتواڑ میں بھارتی انتظامیہ نے موبائل ڈیٹا انٹرنیٹ سروسز معطل کر دی ہیں۔ مذکورہ اقدام ایسے وقت میں اٹھایا گیا ہے جب ضلع کے متعدد علاقوں میں بھارتی فورسز نے وسیع پیمانے پر محاصرے اور تلاشی مہم شروع کر رکھی ہے۔
رپورٹ کے مطابق مقامی حکام نے انٹرنیٹ سمیت تمام موبائل انٹرنیٹ کنیکشن بند کرنے کے احکامات صادر کیے ہیں، جس کا مقصد سکیورٹی کاروائیوں کے دوران معلومات کے پھیلاؤ کو روکنا بتایا جا رہا ہے۔ اطلاعات کے مطابق بھارتی فوج نے کشتواڑ کے علاقوں سنگھ پورہ، چنگام اور چترو میں 29 جنوری سے سخت گیر کارروائیاں نافذ کی ہیں، جہاں فورسز کی کثیر تعداد تعینات کی گئی ہے۔
مقامی ذرائع کے مطابق انٹرنیٹ معطلی سے عوام کو شدید دشواریوں کا سامنا ہے۔ تعلیمی سرگرمیاں معطل ہو چکی ہیں، کاروباری لین دین بند ہو گیا ہے، اور بیرونی دنیا سے رابطہ منقطع ہونے سے روزمرہ کی زندگی مفلوج ہو کر رہ گئی ہے۔
انسانی حقوق کے حلقوں نے اس اقدام پر گہری تشویش کا اظہار کرتے ہوئے کہا ہے کہ مقبوضہ کشمیر میں انٹرنیٹ اور مواصلاتی سہولیات کی معطلی کا سہارا اکثر سیکیورٹی آپریشنز کے دوران حقائق کو دبانے اور عوامی آواز گھٹانے کے لیے لیا جاتا ہے۔