خیبر پختونخوا کے گورنر فیصل کریم کنڈی نے صوبے بھر کے ڈپٹی کمشنرز کو مینٹیننس آف پبلک آرڈر (ایم پی او) آرڈیننس 1960 کی دفعہ 3(1) کے تحت اختیارات تفویض کر دیے ہیں۔
فیصل کریم کنڈی کے مطابق اس اقدام کا مقصد امن و امان کی موجودہ صورتِ حال میں ضلعی سطح پر بروقت اور مؤثر احتیاطی کارروائی یقینی بنانا ہے۔
انہوں نے کہا کہ ان اختیارات کی تفویض سے انتظامی تاخیر کم کرنے اور قانون نافذ کرنے والے اداروں کے ساتھ رابطہ کاری بہتر بنانے میں مدد ملے گی۔
گورنر خیبر پختونخوا نے تمام ڈپٹی کمشنرز کو ہدایت کی کہ وہ ان اختیارات کا استعمال آئین اور قانون کے مطابق کریں۔
انہوں نے زور دیا کہ ڈپٹی کمشنرز ذمہ داری کا مظاہرہ کریں اور قانون نافذ کرنے والے اداروں کے ساتھ قریبی رابطے میں رہیں۔
فیصل کریم کنڈی نے واضح کیا کہ ان اختیارات کا کسی صورت غلط استعمال نہیں ہونا چاہیے۔ ان کے مطابق امن و امان، سلامتی اور عوام کا تحفظ ان کی اولین ترجیح ہے۔
