غزہ کی جنگ کے خاتمے اور خطے میں پائیدار امن کے قیام کے لیے امریکی صدر ٹرمپ کے 20 نکاتی امن منصوبے کو دنیا بھر کے اہم رہنماؤں اور اسلامی ممالک نے بھرپور حمایت دی ہے۔ مختلف ممالک کے سربراہان اور وزرائے خارجہ نے اس منصوبے کو خطے میں امن، استحکام اور ترقی کی طرف ایک اہم قدم قرار دیا ہے۔
صدر ٹرمپ کی قیادت کو سراہتے ہوئے رہنماؤں نے اس بات پر زور دیا کہ دو ریاستی حل ہی اس تنازعے کا مستقل اور منصفانہ حل ہے۔
مزید پڑھیں: https://htnurdu.com/21-points-plan-for-gaza-ceasefire-proposed-by-trump/
شہباز شریف کا بیان
وزیراعظم پاکستان شہباز شریف نے کہا کہ وہ صدر ٹرمپ کے 20 نکاتی منصوبے کا خیرمقدم کرتے ہیں، جو غزہ کی جنگ کے خاتمے کے لیے تیار کیا گیا ہے۔ انہوں نے کہا کہ پائیدار امن فلسطینی عوام اور اسرائیل کے درمیان ممکن ہے اور یہ پورے خطے میں سیاسی استحکام اور معاشی ترقی لانے کے لیے ضروری ہے۔
شہباز شریف نے صدر ٹرمپ کی قیادت کو سراہتے ہوئے کہا کہ خصوصی ایلچی اسٹیو وٹکوف کا کردار بھی انتہائی اہم رہا ہے۔ انہوں نے زور دیا کہ دو ریاستی حل کا نفاذ خطے میں پائیدار امن کے لیے ناگزیر ہے۔
صدر ٹرمپ نے پاکستان کے وزیر اعظم شہباز شریف اور آرمی چیف فیلڈ مارشل سید عاصم منیر کی حمایت پر شکریہ ادا کرتے ہوئے کہا کہ “پاکستانی قیادت نے منصوبے کی 100 فیصد تائید کی ہے”۔
اسلامی ممالک کے وزرائے خارجہ کا مشترکہ اعلامیہ
سعودی عرب، اردن، متحدہ عرب امارات، انڈونیشیا، پاکستان، ترکیہ، قطر اور مصر کے وزرائے خارجہ نے مشترکہ اعلامیہ جاری کیا۔ اعلامیے میں صدر ڈونلڈ ٹرمپ کی قیادت اور غزہ جنگ کے خاتمے کے لیے ان کی مخلصانہ کوششوں کا خیرمقدم کیا گیا۔
وزرائے خارجہ نے امریکہ کے ساتھ شراکت داری کو خطے میں امن کے قیام کے لیے اہم قرار دیا۔ اعلامیے میں واضح کیا گیا کہ غزہ کی تعمیر نو، فلسطینی عوام کی بے دخلی کی روک تھام، انسانی امداد کی فراہمی، اسرائیلی انخلا اور دو ریاستی حل ہی پائیدار امن کا راستہ ہے۔
فرانسیسی صدر ایمانوئل میکرون کا بیان
میکرون نے کہا کہ وہ صدر ٹرمپ کی کوششوں کا خیرمقدم کرتے ہیں اور توقع رکھتے ہیں کہ اسرائیل اس منصوبے پر سنجیدگی سے عمل کرے گا۔ انہوں نے کہا کہ حماس کے پاس یرغمالیوں کی فوری رہائی کے سوا کوئی راستہ نہیں۔
میکرون نے زور دیا کہ دو ریاستی حل اور فرانس و سعودی عرب کی مشترکہ قرارداد کے تحت 142 اقوام متحدہ کے رکن ممالک کے اصولوں پر امن عمل آگے بڑھایا جائے۔
برطانوی وزیراعظم کا بیان
برطانوی وزیراعظم نے بھی صدر ٹرمپ کے امن منصوبے کو “گہری خوش آئند پیش رفت” قرار دیا۔ ان کے مطابق یہ اقدام خطے میں جنگ بندی اور پائیدار امن کی طرف ایک مضبوط قدم ہے۔
بھارتی وزیراعظم نریندر مودی کا بیان
بھارتی وزیراعظم مودی نے کہا کہ صدر ٹرمپ کا جامع منصوبہ طویل مدتی اور پائیدار امن کے لیے قابلِ عمل راستہ فراہم کرتا ہے۔ انہوں نے کہا کہ یہ منصوبہ فلسطینی اور اسرائیلی عوام کے ساتھ ساتھ پورے مغربی ایشیا کے لیے ترقی اور سلامتی کی ضمانت ہے۔
مودی نے امید ظاہر کی کہ تمام فریق صدر ٹرمپ کی اس کوشش کی حمایت کریں گے۔
ترک صدر رجب طیب ایردوان کا بیان
صدر ایردوان نے کہا کہ وہ صدر ٹرمپ کی قیادت کو سراہتے ہیں، جنہوں نے غزہ میں خونریزی کے خاتمے اور جنگ بندی کے لیے اہم کردار ادا کیا۔ انہوں نے کہا کہ ترکیہ اس عمل میں مثبت کردار ادا کرتا رہے گا تاکہ ایک ایسا امن قائم ہو جو سب کے لیے قابلِ قبول ہو۔
دیکھیں: امریکی صدر ٹرمپ کی اردوان سے اہم ملاقات، غزہ اور یوکرین میں جنگ بندی پر گفتگو