طالبان مخالف افغان مزاحمتی تنظیم ایم این ایف کی کارروائیوں میں اضافہ دیکھا جا رہا ہے۔ قندھار کے بعد پکتیا میں ایک بڑے حملے میں ٹی ٹی پی اور القاعدہ سمیت افغان طالبان کے 5 اہلکار ہلاک اور 3 زخمی ہوگئے جبکہ طالبان کی رینجرز گاڑی مکمل تباہ ہوگئی۔ سورس کے مطابق افغان طالبان کی ایک فوجی گاڑی میں ٹی ٹی پی اور القاعدہ کے دہشت گردوں کو ایک سے دوسری جگہ منتقل کیا جا رہا تھا کہ پکتیا کے علاقے دند پتن میں نامعلوم عسکریت پسندوں نے گھات لگا کر گاڑی پر حملہ کردیا۔
شدید نوعیت کی فائرنگ اور عسکریت پسندوں کی جانب سے دستی بم استعمال کیے جانے کے نتیجے میں 5 افراد ہلاک ہوگئے۔ سورس کے مطابق مارے جانے والوں میں القاعدہ کے 2، ٹی ٹی پی کا ایک اور افغان طالبان کے 2 دہشت گرد شامل ہیں، جبکہ 3 زخمیوں میں ایک کا تعلق ٹی ٹی پی اور دو کا افغان طالبان سے بتایا گیا ہے۔ افغان طالبان نے اس واقعہ کی کوئی تفصیل جاری نہیں کی، لیکن جبہۃ بسیج ملی (این ایم ایف) نے اس واقعہ کی ذمہ داری قبول کی ہے اور مزید حملے جاری رکھنے کی دھمکی دی ہے۔
این ایم ایف نے ایک ہفتے کے دوران ملک کے مختلف صوبوں ژابل، قندھار اور ہرات کے بعد اب پکتیا میں بھی حملہ کرکے اپنی موجودگی اور متحرک ہونے کو ثابت کیا ہے۔