خیبرپختونخوا کے قبائلی اضلاع مہمند اور باجوڑ میں فائرنگ اور دھماکے کے دو الگ واقعات میں 3 افراد جاں بحق ہوگئے، جن میں 2 پولیس اہلکار بھی شامل ہیں۔
پولیس کے مطابق ضلع مہمند کے علاقے ڈاگ تمانزئی میں نامعلوم مسلح افراد نے انسداد پولیو مہم کی ڈیوٹی پر جانے والے پولیس اہلکاروں کو نشانہ بنایا۔ فائرنگ کے نتیجے میں 2 اہلکار موقع پر ہی شہید ہوگئے، جبکہ ایک اہلکار زخمی ہوا۔
زخمی اہلکار کو فوری طبی امداد کے لیے اسپتال منتقل کردیا گیا۔ پولیس کا کہنا ہے کہ واقعے کے بعد ملزمان کی گرفتاری کے لیے علاقے کی ناکابندی کردی گئی ہے۔
باجوڑ میں دھماکا
دوسری جانب باجوڑ کی تحصیل برنگ کے علاقے اصیل ترغاو میں آئی ای ڈی دھماکے کے نتیجے میں ایک شخص جاں بحق ہوگیا۔
پولیس کے مطابق دھماکے میں ایک شخص زخمی ہوا تھا، جسے طبی امداد کے لیے اسپتال منتقل کیا گیا۔ تاہم وہ زخموں کی تاب نہ لاتے ہوئے دم توڑ گیا۔
دھماکے کے بعد پولیس اور قانون نافذ کرنے والے اداروں نے علاقے کو گھیرے میں لے لیا، جبکہ واقعے کی مزید تحقیقات اور سرچ آپریشن جاری ہے۔
دیکھیے: انڈونیشیا: ایک ہی ماہ میں ہزاروں اموات، آخر وجہ کیا بنی؟
